अर्घाखाँची । पाँच दलीय गठबन्धनले अर्घाखाँचीमा चुनावी तालमेल टुंग्याएका छन् । पाँच दलबीच भएको सहमति अनुसार जिल्लाको भूमिकास्थानमा राजमोले नगर प्रमुख पाएको छ ।
नगर प्रमुखमा राजमोले केन्द्रीय सदस्य झविलाल थापालाई उम्मेदवार बनाएको छ ।
यस्तै, भूमिकास्थानको वडा नं २, ४ र ५ को नेतृत्व पनि जनमोर्चाले गर्ने सहमति भएको राष्ट्रिय जनमोर्चा अर्घाखाँचीका अध्यक्ष थम्मन केसीले जानकारी दिनुभयो । बाँकी रहेका वडा ६, ७, ८ र १० मा जनमोर्चाले सदस्य लिएर तालमेल गरेको छ भने भने वडा नं १ र ३ मा मैत्रीपूर्ण प्रतिष्पर्धा गर्ने जनाएको छ ।
यता, मालारानी गाउँपालिका वडा नं ८ को नेतृत्व पनि राष्ट्रिय जनमोर्चाले पाएको छ । त्यसैगरी सन्धिखर्क नगरपालिकाको सबै वडामा जनमोर्चाले सदस्य पाएको छ भने दुई जना कार्यपालिका सदस्य लिने सहमति भएको अध्यक्ष केसीले बताउनुभयो ।
जिल्लाका पालिकाहरुमध्ये जनमोर्चाले नेतृत्व गरेको भूमिकास्थानमा उपप्रमुख माओवादी केन्द्रले पाएको छ । यस्तै, सन्धिखर्क, सितगंगा, छत्रदेवको प्रमुखमा नेपाली कांग्रेस र मालारानीमा माओवादी केन्द्रले प्रमुख पाएको छ ।
जिल्लाका ६ वटा वडामा सदस्यसहित एकीकृत समाजवादीलाई समेटिएको छ ।
