केरसिंह अदै, कपिलवस्तु ।
राष्ट्रिय जनमोर्चाका कार्यकारी अध्यक्ष रश्मीराज नेपालीले सत्ताधारी दलहरुले नेपाली जनताको मतमाथि खेलवाड गरिरहेको आरोप लगाउनुभएको छ ।
आइतबार कपिलवस्तुको शिवराज नगरपालिका चन्द्रौटामा आयोजित राष्ट्रिय जनमोर्चाको चुनावी सभालाई सम्बोधन गर्दै कार्यकारी अध्यक्ष नेपालीले नेपाली जनताले जहिले पनि परिवर्तनको लागि आन्दोलन गरेको तर सत्ताधारी हरुले जनताको आन्दोलन र मतमाथि खेलवाड गरेको बताउनुभयो ।
उहाँले ठूला दलले नेपाल कृषि प्रधान देश भन्दै गरेपनि कृषिको लागि कुनै काम, योजना नल्यायको बताउनुभयो । समृद्ध नेपालको नारा ओकल्नेहरुले नै पचास लाख युवालाई खाडी मुलुकमा जान बाध्य पारेको उहाँको भनाई थियो ।
कार्यकारी अधयक्ष नेपालीले कथित ठूला दलले नेपालको जल सम्पदा, कलकारखाना उद्योग बेच्ने काम गरेको, देशमा सीमा अतिक्रमण हुँदा नबोल्ने, एमसीसी जस्तो राष्ट्रघाती प्रावधानलाई स्वीकार गरेको बताउनुभयो ।
उहाँले जनताले अबको निर्वाचनमा धेरै मूल्यांकन गरेर मात्रै भोट हाल्नु पर्ने बताउनुभयो । कार्यक्रममा तराई मधेश जनवादी मोर्चाका केन्द्रीय अध्यक्ष बद्रे आलमले देशमा सिमित प्रकारको लोकतान्त्रिक गणतन्त्र, धर्म निरपेक्षतालाई समाप्त पार्न प्रतिगामी शक्तिहरू लागि परेको उल्लेख गर्दै यसको रक्षाका लागि पाँचदलीय गठबन्धन गर्नु परेको बताउनुभयो ।
सभालाई राष्ट्रिय जनमोर्चा जिल्ला अध्यक्ष दधिराम आचार्य, नेकपा (मसाल) का जिल्ला प्रवक्ता छबिलाल गैरे, अखिल नेपाल किसान महासंघका उपा अध्यक्ष तथा सुकुम्बासी आयोग कपिलवस्तुका अध्यक्ष शिव पौडेल, अखिल नेपाल ट्रेड युनियन महासंघ (अन्टुक) का केन्द्रीय सदस्य तथा जिल्ला अध्यक्ष केर सिंह अदै, मूल प्रवाह अखिल भारत नेपाली एकता समाजका केन्द्रीय अध्यक्ष ठाकुर प्रसाद खनाल, जातीय समता समाजका केन्द्रीय सल्लाहकार दिल बहादुर विकले सम्बोधन गर्नु भएको थियो ।
कायक्रममा अखिल नेपाल जनजाति सम्मेलनका केन्द्रीय सदस्य नरबहादुर पुन, राष्ट्रिय जनमोर्चा विजयनगर गाउँपालिका अध्यक्ष गोपाल सुनारको आतिथ्यता रहेको थियो ।
राष्ट्रिय जनमोर्चा नगर अध्यक्ष केहर सिंह पुनको अध्यक्षतामा भएको कार्यक्रमको सञ्चालन जिल्ला कोषाध्यक्ष चेत नारायण खनालले र स्वागत राजमो शिवराज नगर समिति सचिव तथा रक्तिम सांस्कृतिक अभियान नगर अध्यक्ष बेगम बुढाले गर्नु भएको थियो ।
