रिसव आचार्य कपिलवस्तु ।
राष्ट्रिय जनमोर्चाका अध्यक्ष चित्रबहादुर केसीले हिन्दु धर्मका नाममा पुनः राजतन्त्र फर्काउने षडयन्त्र भइरहेको बताउनुभएको छ ।
शुक्रबार कपिलवस्तुको वाणगंगा नगरपालिकास्थित बैदोलीमा राजमोले आयोजना गरेको चुनावी सभामा बोल्दै अध्यक्ष केसीले गणतन्त्र सिध्याउन खोज्नेहरू अहिले धर्मनिरपेक्षता हटाउन राजा आऊ देश बचाऊ भनिरहेको बताउनुभयो ।
केसीले नेकपा एमाले अध्यक्ष केपी शर्मा ओलीले पशुपतिमा जलहरी चढाएर नेपालमा हिन्दु राज्य र राजतन्त्र पुनर्स्थापना गर्न खोज्ने भारतलाई खुसी पारेको बताउनुभयो ।
‘कोरोनाले मुलुक थिलथिलो भइरहेका बेला वामपन्थी भन्ने केपी शर्मा ओलीले पशुपतिमा १ सय ८ किलोको जलहरी किन चढाउनु पर्यो ?’ केसीले भन्नुभयो, ‘त्यति महँगो सुन । त्यो पशुपतिको होइन, भारतीय प्रधानमन्त्री नरेन्द्र मोदीको पूजा हो ।’
अध्यक्ष केसीले वर्तमान सरकार मरमादेशबाट जन्मिएको भन्ने एमाले पनि सर्वोच्च अदालतको परमादेशबाट जन्मिएको पार्टी भएको बताउनुभयो ।
‘सर्वोच्चले एमालेलाई एमाले र माओवादीलाई माओवादी बनाएको वैधानिक हुने,’ केसीले प्रश्न गर्नुभयो, ‘तर, त्यही सर्वोच्च अदालतले फैसला गरेर बनाएको सरकारलाई परमादेशी भनेर होच्याउने कस्तो सोचाइ हो ?’
माधव नेपाल र झलनाथ खनालले पार्टीमा विद्रोह नगरेको भए ओलीले अहिलेसम्म गणतन्त्र सिध्याइसक्ने केसीको भनाई थियो ।
‘एमालेको पार्टी र पदको झगडाको सिकार नेपाली जनता भए,’ उहाँले भन्नुभयो, ‘प्रतिगमनविरुद्ध सबै एक हुनुपर्छ भनेर जनमोर्चाले अग्रसरता लिएर सबैलाई एकजुट बनाएको हो ।’
अहिले चित्रबहादुर कांग्रेस भयो भनेर प्रतिगामीहरू प्रचार गरिरहेको बताउँदै उहाँले प्रतिगमनविरुद्ध कांग्रेस, माओवादी र मधेसवादी एक भएकाले सहकार्य गरेको दाबी गर्नुभयो । यी पार्टीसँग धेरै असहमति भए पनि ओलीतन्त्रविरुद्ध एक भएको उहाँले स्पष्ट पार्नुभयो ।
०७४ को संसदीय निर्वाचनमा एमाले र माओवादी मिलेर चुनावमा जान थालेपछि आफूलाई कांग्रेस सभापति शेरबहादुर देउवालगायत नेताहरुले मागेजति लिएर कांग्रेससँग सहकार्य गर्न आग्रह गरेको स्मरण गर्नुभयो ।
‘तर, म चोर चण्डाल भए नि वामपन्थीसँग मिलेर जान्छु भनेर हिँडे,’ केसीले भन्नुभयो ‘तर, ओलीले लगेर खाल्टोमा जाके ।’
त्यस्तै, राजमो जिल्ला अध्यक्ष दधिराम आचार्य र जिल्ला उपाध्यक्ष राम प्रसाद बेल्बासेले पनि सम्बोधन गर्नु भएको थियो ।
कार्यक्रममा मूल प्रवाह अखिल भारत नेपाली एकता समाजका अध्यक्ष ठाकुर खनाल, अखिल नेपाल किसान महासंघका केन्द्रीय उपाध्यक्ष शिव पौडेल, नेकपा (मसाल)का जिल्ला प्रवक्ता छविलाल गैरे, राजमो लुम्बिनी प्रदेश कोषाध्यक्ष गणेश गौतम, अखिल नेपाल महिला संघ जिल्ला सदस्य रिता पाण्डे, अखिल नेपाल युवक संघ जिल्ला सचिव विनोद परियार, अखिल नेपाल जनजाति सम्मेलनका केन्द्रीय सल्लाहकार मनबहादुर सिंजालि लगायतको आतिथ्यता रहेको थियो ।
कार्यक्रम राजमो नेता मुक्तिराम न्यौपानेको अध्यक्षता, डबल सिंह जिसीको स्वागत मन्तव्य तथा शशी सापकोटाको सञ्लनमा सम्पन्न भएको थियो ।
