टेकराज भुसाल (टेकु), बुटवल ।
राष्ट्रिय जनमोर्चाका केन्द्रीय सदस्य एवं सुदूरपश्चिम इन्चार्ज मनोज भट्टले कालापानीबाट भातीय सेना तत्काल फिर्ता पठाउन सरकारसँग माग गर्नुभएको छ ।
राजमो रुपन्देहीले शनिबार बुटवलमा आयोजना गरेको ‘गणतन्त्र, राष्ट्रियता र धर्मनिरपेक्षताको रक्षा’ विषयक अन्तरक्रिया कार्यक्रममा अवधारणा पत्र प्रस्तुत गर्दै अतिक्रमित भूभाग फिर्ता गराउन सरकारले छिट्टै पहल कदमी चाल्नुपर्ने बताउनुभयो ।
भूमि रक्षा गर्नका नागरिक सडकमा आउनुपर्ने बताउँदै भट्टले नेपालको दार्चुला जिल्लाको उत्तर पश्चिममा रहेको कालापानी, लिपुलेक र लिम्पीयाधुरा समेटेर नक्सा सार्वजनिक गर्नु भारतीय हस्तक्षेपको नाङ्गो रुप भएको बताउनुभयो । उहाँले कालापानी सहित देशका विभिन्न सीमा क्षेत्र भारतीय अतिक्रणको चपेटामा परिरहेको भन्दै अहिले जनतामा जागरण र राष्ट्रिय रुपमै एकता भएको बेला सरकारले अतिक्रमण विरुद्ध प्रभावकारी कदम चाल्नुपर्ने बताउनुभयो ।
अन्तरक्रिया कार्यक्रममा नेकपा (माले)का स्थाई समिति सदस्य गोपालमणि गौतम, अखिल (छैठौं) का केन्द्रीय अध्यक्ष बिमल पोख्रेल, नेकपा (मसाल) रुपन्देहीका प्रवक्ता नारायण जिसी, नेपाली कांग्रेस रुपन्देहीका कोषाध्यक्ष दिपक क्षेत्री न्यौपाने, देशभक्त जनतान्त्रिक मोर्चा नेपालका जिल्ला अध्यक्ष राम प्रसाद शर्मालगायतको उपस्थित रहेको थियो ।
कार्यक्रम राष्ट्रिय जनमोर्चा रुपन्देहीका अध्यक्ष बद्रे आलमको अध्यक्षता, राजमो नेता नेत्र आचार्यको सञ्चालन र जिल्ला सचिव टानबहादुर खत्रीको स्वागत मन्तव्यमा सम्पन्न अघि बढेको थियो ।
बुटवलदेखि-सुनौली मोटरसाइकल -याली
नेपाली भूभाग समेटेर भारतले जारी गरेको नक्साको विरोधमा राष्ट्रिय जनमोर्चा बुटवल उप–महानगरको आयोजनमा बुटवलदेखि सुनौली नाकासम्म बाईक र्याली गरेको छ ।
र्यालीमा कालापानी, लिपुलेक हाम्रो हो, भारतीय सेना कालापानी छोड, मिचिएको भूमि फिर्ता गर, राष्ट्रियताको रक्षा गरौँ, हिमाल पहाड तराई कोही छैन पराई, भारतीय साम्राज्यवाद मुर्दावाद, राष्ट्रिय जनमोर्चा जिन्दवाद, नेकपा मसाल जिन्दावाद जस्ता नारासमेत लगाएका थिए ।
मोटरसाइकल यालीपछि आयोजित सभालाई राजमो केन्द्रीय सदस्य मनोज भट्टले सम्बोधन गर्नुभएको थियो । भारतले नेपाली भूमि समेटेर नयाँ नक्सा सार्वजनिक गरेदेखि नै राजमोले देशब्यापीरुपमा विरोध गरिरहेको छ ।
