बुटवल । चुनावी गठबन्धनमा रहेका पाँच राजनीतिक दलले लुम्बिनीमा संयुक्त अनुगमन कार्यदल गठन गरेका छन् । सोमबार बसेको गठबन्धनको बैठकले संयुक्त स्थलगत अनुगमन गर्न कार्यदल गठन गरेको हो ।
कार्यदलमा कांग्रेसका राजु खनाल, माओवादी केन्द्रका लुमाकान्त न्यौपाने, एकीकृत समाजवादीका अशोक कोइराला, जसपाका अशोक कुमार यादव र राष्ट्रिय जनमोर्चाका बोमबहादुर खत्री रहनुभएको छ ।
यस्तै, बैठकले सबै दलको प्रतिनिधित्व हुने गरी संयुक्त चुनावी संयन्त्र गठन गर्ने निर्णय पनि गरेको छ । जिल्लास्तरीय गठबन्धनको संयन्त्रबाट सहमति कायम गरी प्रदेशमा रिपोर्ट पठाउन पनि आग्रह गरिएको छ ।
बैठकमा माओवादी केन्द्रबाट मुख्यमन्त्री कुलप्रसाद केसी, प्रदेश अध्यक्ष सुदर्शन बराल, कांग्रेसका प्रदेश सभापति अमरसिंह पुन र उपसभापति भुवन श्रेष्ठ, एकीकृत समाजवादीका प्रदेश सचिव राजु गुरुङ, जनता समाजवादी पार्टीका अशोककुमार यादव र राष्ट्रिय जनमोर्चाका बद्रे आलमलगायत नेताहरु सहभागी हुनुहुन्थ्यो ।
यस्तै, बैठकले पालिकामा अन्य दलसँग तालमेल गर्न नपाउने निर्णय पनि गरेको छ । बैठकमा उपस्थित नेताहरुले गठबन्धनमा रहेका केही दलले गठबन्धन बाहिर तालमेल गर्न खोजेको आशंका व्यक्त गरेका थिए ।
नेपाली कांग्रेसका नेताहरुले केही ठाउँमा माओवादी र एमाले मिल्न खोजेका आशंका गरेको थियो भने माओवादीले पनि कांग्रेसले राप्रपा लगायतका दलसँग तालमेल गर्न खोजेको भन्दै प्रश्न उठाएको थियो ।
त्यसपछि ५ दलले गठबन्धन बाहिरका अन्य दलसँग तालमेल नगर्ने निर्णय गरेका हुन् ।
