काठमाडौं । दोलखा जिल्लाको मेलुङ गाउँपालिका वार्ड नं.५ डाडाखर्क माध्यमिक विद्यालयमा एक दिवसीय शिक्षकहरुको क्षमता अभिवृद्धि तालिम सम्पन्न भएको छ ।
चैत्र २५ गते शुक्रबार सम्पन्न तालिमको बिषय शिक्षण एवं शिक्षण पेशा एक सामुहिक पुनरावलोक थियो । तालिमको सहजकर्ता त्रिभुवन विश्वविद्यालयका सह प्राध्यापक डा.चुडा ढकाल हुनुहुन्थ्यो । विद्यालयका शिक्षक व्यवस्थापक समितिका पदाधिकारी तथा स्थानीय जनप्रतिनिधि र अभिभावकहरु समेत सहभागि भएको तालिम कार्यक्रम पश्चात सहभागिहरुलाई नमुना तालिम तथा अनुसन्धान प्रालिको तर्फबाट प्रमाणपत्र समेत वितरण गरिएको थियो ।
विद्यालय व्यवस्थापन समितिका अध्यक्ष सूर्यबहादुर थापाको अध्यक्षतामा सुरु भएको प्रमुख अतिथि मेलुङ गापाका वडाध्यक्ष मानबहादुर मगर हुनुहुन्थ्यो । तालिम कार्यक्रमको उद्घाटन प्रमुख अतिथि थापाले र स्वागत विद्यालयका प्राधानाध्यापक प्रवीण मोक्तानले गर्नुभएको थियो । सो अवसरमा समाजसेवी उद्धव थापामगर, विद्यालय व्यवस्थापन समितिका पूर्व अध्यक्ष अर्जुन बहादुर थापा, वडासदस्य टेकबहादुर थापा लगायतका अतिथिहरुले आतिथ्यता गर्नु भएको थियो ।
कार्यक्रमकै बीच समाजसेवी उद्धव थापाले आफ्नो तर्फबाट विद्यालयको लागि खेल सामग्री हस्तान्तरण गर्नुभएको थियो । त्यसैगरि आधारशीला कलेजका अध्यक्ष भोला ढकालले विद्यालयको पुस्तकालयको लागि प्रकाशनहरु हस्तान्तरण गर्नुभएको थियो ।
तालिम कार्यक्रमको समापनको सन्दर्भमा एक संक्षिप्त कार्यक्रम सम्पन्न भयो । सो अवसरमा सहभागि शिक्षकहरुको तर्फबाट २ जना प्रतिनिधिले तालिम कार्यक्रमको बारेमा धारणाहरु राख्नुभयो । तालिमको आयोजक, प्रायोजक तथा प्रशिक्षकलाई विद्यालयका प्रधानाध्यापक प्रवीण मोक्तानले धन्यवाद ज्ञापन गर्नुभयो ।
आयोजकको तर्फबाट कार्यक्रमका संयोजक रमेश पौडेलले धन्यवाद ज्ञापन गर्नुभयो । सो अवसरमा आधारशीला कलेजका अध्यक्ष भोला ढकालले पनि संक्षिप्त मन्तव्य राख्नुभएको थियो ।
