श्यामलाल पोखरेल, बुटवल ।
शोविशन–किरण स्मृति फाउन्डेसन रुपन्देहीले बुटवलको मानव सेवा आश्रमलाई आर्थिक सहयोग गरेको छ । फाउन्डेसनले शोविशन र किरण पाण्डेको स्मृतिमा मानव सेवा आश्रमलाई ११ हजार आर्थिक सहयोग गरेको हो ।
२०७८ चैत २१ गते सोमबार बुटवलको मानव सेवा आश्रममा कार्यक्रमको आयोजना गरी फाउन्डेसन परिवारले आर्थिक सहयोग गरेको छ ।
फाउन्डेसनले शोविशन–किरणको स्मृतिमा वार्षिक रूपमा गरिब, रक्तदान कार्यक्रमको आयोजनाका साथै विपन्न तथा असहायहरूलाई सहयोग गर्दै आएको छ । गत वर्ष कोरोना रोकथाम तथा उपचारका लागि तिलोत्तमा नगरपालिकाले स्थापना गरेको राहतकोषका लागि आर्थिक सहयोग गरेको फाउन्डेसनले यस वर्ष आश्रममा आश्रितका लागि आर्थिक सहयोग गरेको हो ।
कार्यक्रममा बोल्दै लोक तथा दोहोरी गीत प्रतिष्ठान नेपाल लुम्बिनी प्रदेशका अध्यक्ष डिल्लीनारायण पाण्डेयले मानवीय सहयोग नै वास्तविक धर्म भएको बताउँदै शोविसन–किरणप्रति श्रद्धासुमन व्यक्त गरे ।
कार्यक्रममा फाउन्डेसनका संरक्षक विष्णुजी पाण्डे, लोक तथा दोहोरी गीत प्रतिष्ठान नेपाल रुपन्देही अध्यक्ष दीपक कार्की, मानव सेवा आश्रमका शेरबहादुर गौतम, फाउन्डेसनका उपाध्यक्ष अनुरजक, डाक्टर सतिष रुपाखेती, नारायण थापलगायतले बोल्दै शोविसन–किरण फाउन्डेसनलाई थप व्यवस्थित र कोष बढाउनुपर्नेमा जोड दिए ।
फाउन्डेसनका अध्यक्ष धनबहादुर गुरुङको अध्यक्षता र प्रदीप जिसीको सञ्चालनमा कार्यक्रम भएको थियो ।
गत २०७२ चैत २० र २१ गते अल्पआयुमै शोविशन र किरण पाण्डेको निधन भएको थियो। रुपन्देहीका हास्यव्यङ्ग्य कलाकार विष्णुजी पाण्डे ‘माइला बा’ र शोभा पाण्डेका दुवै छोरा शोविशन र किरणको एक दिनको फरकमा उपचारको क्रममा मृत्यु भएको थियो । तातो दुधमा परेर गम्भीर घाइते भएका शोविशनको २०७२ चैत २० गते उपचारको क्रममा काठमाडौमा निधन भएको थियो । त्यस्तै ज्वरो र पखालाको अवस्थामा उपचारकै क्रममा शोविशनका भाइ किरणको एक दिनको फरकमा २१ गते बुटवलको सिद्धार्थ महिला तथा बाल अस्पताल आम्दामा निधन भएको थियो । शोविशन पाण्डे दुई वर्षका थिए भने किरण पाण्डे सात महिनाका थिए ।
सबैको मन छुने अकल्पनीय घटना घटेपछि कलाकार, पत्रकार र सामाजिक व्यक्तित्वको सक्रियतामा कलाकार धनबहादुर गुरुङ अध्यक्ष रहेको शोविशन–किरण फाउन्डेसन गठन गरिएको थियो । शोविशन र किरणका बाबा विष्णुजी पाण्डे ‘माइला बा’ संरक्षक रहेको शोविशन–किरण फाउन्डेसन अहिले रुपन्देहीमा सक्रिय छ ।
फाउन्डेसनले रुपन्देहीको तिलोत्तमा नगरपालिकाले स्थापना गरेको कोरोना रोकथाम तथा उपचार राहत कोषका लागि २५ हजार सहयोग गरेको थियो ।
