काठमाडौं । चिनियाँ विदेशमन्त्री तथा स्टेट काउन्सिलर वाङ यी आज (शुक्रबार) नेपाल आउँदै हुनुहुन्छ । विदेशमन्त्री वाङ नेतृत्वको २५ सदस्यीय चिनियाँ टोली शुक्रबार, शनिबार र आइतबार तीन दिन नेपालमा रहने भएको छ ।
नेपाल आएलगत्तै आज काठमाडौँस्थित चिनियाँ राजदूत होउ यान्छी र दूतावासका अधिकारीसँग ब्रिफिङ लिने र भोलि उच्च भेटघाट गर्ने कार्यक्रम छ ।
शनिबार बिहान १० बजे परराष्ट्रमन्त्री डा. खड्कासँग वाङले दुई पक्षीय भेटवार्ता गर्नुहुने छ । खड्काले वाङलाई दिवाभोज दिने कार्यक्रम छ । त्यही समय नेपाल र चीनबीच विभिन्न समझदारीपत्रमा हस्ताक्षर हुने तय भएको छ। शनिबार दिउँसो नै वाङले प्रधानमन्त्री शेरबहादुर देउवालाई बालुवाटारमा भेट्नुहुने छ ।
आइतबार बिहान ९ बजे वाङले राष्ट्रपति विद्यादेवी भण्डारीसँग शिष्टाचार भेट गर्ने कार्यक्रम छ । त्यसपछि उहाँले माओवादी अध्यक्ष पुष्पकमल दाहाल र एमाले अध्यक्ष केपी शर्मा ओलीलाई पालैपालो भेट गरी आइतबार दिउँसो ३ बजे बेइजिङ उड्ने कार्यक्रम रहेको परराष्ट्र मन्त्रालयले जनाएको छ ।
विदेशमन्त्री वाङ पाकिस्तान, अफगानिस्तान र भारत हुँदै आज नेपाल आउन लाग्नुभएको हो ।
छिमेकी चीनले नेपालका लागि वार्षिक अनुदान सहयोगमा वृद्धि गर्ने भएको छ । वाङ यीको नेपाल भ्रमणका क्रममा दस वटा सहमति/सम्झौता हस्ताक्षर गर्ने तयारी भइरहेको भ्रमण तयारीमा संलग्न परराष्ट्र मन्त्रालयका अधिकारीहरुले बताएका छन् । तीमध्ये दुई देशबीच आर्थिक तथा प्राविधिक सहयोगसम्बन्धी सम्झौता अन्तर्गत चीनले नेपाललाई वार्षिक अनुदान सहयोग बढाउन लागेको हो।
परराष्ट्र मन्त्रालयका एक अधिकारीका अनुसार चीनले नेपाललाई वार्षिक अनुदान सहायता करिब १५ अर्ब रुपैयाँ पुर्याउने भएको छ। चीनले अहिले नेपाललाई वार्षिक करिब १३ अर्ब रुपैयाँ दिँदै आएको छ।
राष्ट्रपति सी चिनफिङको नेपाल भ्रमणका क्रममा घोषणा भएको ५६ अर्ब अनुदान सहयोग कार्यान्वयनको विषय पनि यो भ्रमणमा छलफल हुने भएको छ।
सन् २०२० देखि २०२२ सम्म खर्च गर्ने सहमति भएको अनुदान सहयोग कार्यान्वयनका लागि दुई देशबीच औपचारिक सम्झौता हुन सकेको थिएन। नेपालले त्यसबारे चिनियाँ पक्षको ध्यानाकर्षण गरेको थियो।
विदेशमन्त्री वाङको भ्रमणका दौरान कोरला नाका खोल्ने सहमति हुने छ भने भरतपुर क्यान्सर अस्पतालमा सहयोगबारे समझदारी पत्र आदान प्रदान हुने छ ।
यस्तै, चीनतर्फ विकासे घाँस निर्यातबारे समझदारी हुने, नेपालमा अड्केका विद्यार्थी चीन फर्काउने घोषणा गर्ने, पोखरा विमानस्थलको टर्मिनल भवन उद्घाटन गर्ने कार्यक्रम छ ।
