काठमाडौँ । नेपाली कांग्रेसका उपसभापति धनराज गुरुङले माओवादी केन्द्रका अध्यक्ष पुष्पकमल दाहाल प्रचण्डलाई ‘भिखारी’ को संज्ञा दिनुभएको छ ।
पूर्वप्रधानमन्त्री गिरिजाप्रसाद कोइरालाको स्मृति दिवसका अवसरमा सोमबार नेता गुरुङले प्रचण्ड आफ्नो अस्तित्व रक्षाका लागि कहिले बालकोट त कहिले बालुवाटार पुग्ने गरेका बताउनुभयो ।
उपसभापति गुरुङले प्रचण्डको अहिलेको अवस्था देखेर आफूलाई विचरा भन्न मन लागेको भन्दै व्यङ्ग्यसमेत गर्नुभयो ।
‘गिरिजाप्रसाद कोइरालाले म हारे पनि देश हार्नु हुँदैन भन्नुहुन्थ्यो। तर उहाँसँगै शान्ति सम्झौतामा हस्ताक्षर गरेका प्रचण्ड भने आफू हार्नु नपरोस्, देशले हारे केही हुन्न भनिरहनु भएको छ’ उहाँले भन्नुभयो, ‘म उहाँलाई भन्न चाहन्छु, एउटा व्यक्तिले हारेर केही हुँदैन, उहाँका छोराछोरीले हार्दा केही हुँदैन। तर देशले हार्नु भएन।’
प्रचण्डको अवस्था देखेर आफूलाई माया लागेको पनि उहाँले बताउनुभयो।
‘तपाईं (प्रचण्ड’ब लाई देखेर मलाई त विचरा भन्न मन लागेको छ’ उहाँले भन्नुभयो, ‘अहिले देखिरहेका छौँ, कहिले कचौरा बजाउँदै केपी ओलीलाई भेट्न बालकोट पुग्नुहुन्छ त कहिले हाम्रा सभापतिलाई भेट्न बालुवाटार पुगिरहनु भएको छ। उहाँको कचौरा आगामी वैशाख ३० गते खालीको खाली पो पर्ने हो कि?’
उनले माओवादी केन्द्र र पुष्पकमल दाहाल प्रचण्डको कचौरा खालीको खाली नहोस् भनेर पनि शुभकामना पनि दिनुभयो। अब सधैँ कांग्रेस र एमालेले प्रचण्डको कचौरा भरिदिराख्न पनि नसक्ने उपसभापति गुरुङले बताउनुभयो ।
माओवादी अध्यक्ष प्रचण्डले आगामी चुनावमा कांग्रेसले गठबन्धन नगरे एमालेसँग तालमेल हुनसक्ने बताइरहेका बेला गुरुङको यस्तो अभिव्यक्ति आएको हो । गुरुङले केही समय अघि प्रचण्ड र एकीकृत समाजवादीका अध्यक्ष माधवकुमार नेपाललाई हात्तीको कानमा चमेरा भन्दै व्यंग्य गर्नुभएको थियो ।
