शंकर प्रसाद पोख्रेल, गुल्मी ।
राष्ट्रिय जनमोर्चाले गुल्मीको दरबार गाउँपालिका र सत्यवती गाउँपालिकामा चुनावी भेला सम्पन्न गरेको छ ।
बिहीबार सम्पन्न दरबार गाउँपालिकाको भेलामा राष्ट्रिय जनमोर्चाका जिल्ला सचिव छबिलाल सर्तुङ्गी र जिल्ला सदस्य हरि न्यौपानेको विशेष अथित्यता रहेको थियो ।
त्यस्तै, सत्यवती गाउँपालिकाको आयोजनामा सम्पन्न भेलामा राजमोका केन्द्रीय सदस्य रामकुमार क्षेत्रीले उद्घाटन गर्दै अझै पनि प्रतिगमनको खतरा रहेकोले प्रतिगामी शक्ति र त्यो भन्दा पनि खतरा राष्ट्रघाती एमसीसी विरुद्ध संघर्ष गर्नु पर्ने बताउनु भयो ।
विशिष्ट अतिथि नेकपा (मसाल) का जिल्ला प्रवक्ता ओमेन्द्र कुँवरले राष्ट्रघाती एमसीसी पास गरेर साम्राज्यवादका दलालहरुले नाटकीय शीलीमा संसदबाट पास गरेको भन्दै युवाहरुको आन्दोलनले त्यो सम्झौता खारेज गर्नु पर्ने बताउनु भयो ।
राजमोका जिल्ला कोषाध्यक्ष टेक बहादुर केसी, अखिल नेपाल महिला संघका जमुना कुँवर, सरस्वती शर्मा, अखिल नेपाल युवक संघका ओम श्रीस, सत्यवती गाउँपालिकाका सचिव कमल पुलामीले भेला सफलताको शुभकामना दिनुभएको थियो ।
सत्यवती गाउँपालिकाका अध्यक्ष मित्रलाल तरामुको अध्यक्षता तथा ओम सिंजापतीको सञ्चालनबाट अघि बढेकोको भेलाले चुनाव परिचालन समिति, आर्थिक समिति, प्रचार प्रसार समिति, लगायत ५१ जनाको समिति गठन गरेको छ ।
