काठमाडौं । नेकपा (एकीकृत समाजवादी) का १४ जना सांसदका मुद्दाको पूर्ण सुनुवाइ आगामी २०७८ चैत २० गते हुने भएको छ ।
नेकपा (एमाले) ले माधवकुमार नेपालसहितका १४ सांसदलाई कारबाही गर्न दर्ता गरेको मुद्दामा चैत २० गते पूर्ण सुनुवाइ हुने भएको हो ।
फागुन २९ गते आइतबार न्यायाधीश ईश्वरप्रसाद खतिवडा र कुमार चुडालको इजलासले लिखित जवाफ परिसकेको र मुद्दामा उठाइएका संवैधानिक र कानुनी प्रश्नको निरुपण छिटोछरिता हुनु मनासिव देखिएको भन्दै चैत २० गते पेसी तोकी पूर्ण सुनुवाइ गर्ने आदेश दिएको छ ।
माधव नेपालसहितका सांसदलाई नेकपा (एमाले) ले गरेको कारबाहीलाई मान्यता नदिएपछि अध्यक्ष केपी शर्मा ओलीले निर्वाचन आयोगलगायत विरुद्ध सर्वोच्च अदालतमा रिट दिएका थिए ।
नेता नेपालसहितका नेताहरूले नेकपा (एकीकृत समाजवादी) गठन नगर्दै नेकपा (एमाले) ले १४ सांसदलाई पार्टीबाट निष्कासन गरेको थियो । पार्टीबाट निष्कासन गरेको जानकारी सङ्घीय संसद् सचिवालयमा पठाउँदा सभामुखले सूचना टाँस नगरेर उनीहरूको सांसद पद कायम गरिदिएको भन्दै नेकपा एमालेले गत २३ फागुनदेखि संसद अवरोध गर्दै आएको छ ।
त्यस्तै, निष्कासनमा परिसकेका नेताहरूले सनाखत गरेर अर्को पार्टी गठन गरेको भन्दै त्यसलाई मान्यता नदिन एमालेले निर्वाचन आयोगसित आग्रह गरेको थियो । तर निर्वाचन आयोगले माधव नेपालसहित एमालेले कारबाही गरेका नेताहरूकै सनाखतबाट एकीकृत समाजवादी दल दर्ता गरेपछि एमाले सर्वोच्च गएको थियो ।
त्यसैगरी, लुम्बिनी प्रदेशसभामा पनि नेकपा एमालेले सांसदहरू विमला खत्री वली र अजय शाहीलाई कारबाही गरेको थियो । त्यहाँ पनि सभामुखले उनीहरूमाथिको कारबाहीलाई मान्यता नदिएपछि एमालेले यो विषयमा पनि सर्वोच्चमा रिट दायर गरेको थियो । चैत २० गते हुने पूर्ण सुनुवाइमा यी सबै मुद्दा एकैपटक सुनुवाइ हुने बताइएको छ ।
