टेकराज भुसाल, बुटवल ।
राष्ट्रघाती एमसीसी सम्झौता विरुद्ध रुपन्देहीको बुटवलमा अखिल (छैठौं) सहित ४ विद्यार्थी संगठनले रचना वाचन कार्यक्रम गरेका छन् ।
अखिल (छैठौं), अखिल (क्रान्तिकारी), वैज्ञानिक समाजवादी विद्यार्थी संगठन र अखिल (क्रान्तिकारी) ले संयुक्त रुपमा चाँदबारीस्थित राष्ट्रिय जनमोर्चाको लुम्बिनी प्रादेशिक कार्यलयमा रचना वाचन कार्यक्रम गरेका हुन्।
कार्यक्रममा बोल्दै अखिल (छैंठौँ) का केन्द्रीय सचिव सरोजमान सिंहले राष्ट्रघात विरुद्धको आन्दोलनमा ४ विद्यार्थी संगठन सदैव सँगसँगै रहने बताउँदै रचना वाचन कार्यक्रमले एमसीसी खारेजीको लागि चेतावनी दिने बताउनुभयो।
त्यस्तै अखिल नेपाल लेखक संघका महासचिव खोमा तरामु मगरले कविता वाचन गर्दै नेपाली जनताले स्वीकार नगरेको राष्ट्रघाती एमसीसी जवरजस्त संसदबाट अनुमोदन गरे पनि कार्यान्वयन हुन दिन नहुने बताउनुभयो।
कार्यक्रममा खोमा तरामु, टेकराज भुसाल, बिहानी मगर, साया किरण, पारस राहादी मगर, अनिल थापा, विमल खरेललगायतले कविता, गीत, गजलमार्फत् राष्ट्रघाती सम्झौता एमसीसी अनुमोदनको विरोध जनाएका थिए । कार्यक्रममा स्रष्टाहरूले रचना वाचन गर्दै कुनै हालतमा एमसीसी खारेजीको माग गरे ।
कार्यक्रम अखिल (छैठौं) रुपन्देहीका सहसचिव टेकराज भुसालको अध्यक्षता र अखिल (क्रान्तिकारी) रुपन्देहीका उपाध्यक्ष पारस राहादीको सञ्चालनमा सम्पन्न भएको थियो।
