काठमाडौं । राष्ट्रिय जनमोर्चा सुदूरपश्चिम प्रदेश समितिको आयोजनामा सञ्चालित कालापानी अभियानको मंगलबार महेन्द्रनगरमा समापन हुँदैछ ।
मंसिर ११ गते धनगढीबाट सुरु भएको मोटरसाइकल -याली सीमा अतिक्रमण विरुद्ध खबरदारी गर्दै दार्चुलासम्म पुगेर फर्किएको हो । त्यस क्रममा अत्तरिया, बुडर, डडेल्धुरा, गोकुलेश्वर, खलंगा, बैतडीको गोठालापानी, पाटन, डोटी दिपायललगायत विभिन्न स्थानमा विरोध सभा सम्पन्न भएको छ ।
पहाडको अप्ठेरो बाटोमा मोटरसाइकल यालीका क्रममा कयौं सहभागी घाइते भएका छन् भने दार्चुलामा प्रहरीले नै यालीलाई अवरोध पुर्याउने काम गरेको थियो । तैपनि सबै अवरोधलाई चिर्दै ‘कालापनी अभियान’ महेन्द्रनगर पुगेको छ ।
महेन्द्रनगरमा अभियानका समापन हुँदैछ । समापन कार्यक्रममा राष्ट्रिय जनमोर्चाका अध्यक्ष चित्रबहादुर केसीले सम्बोधन गर्दै हुनुहुन्छ ।
विभिन्न अवरोध छिचोल्दै समापनमा पुगेको अभियानमा सहभागीहरु के भन्छन् ? हामीले केही सहभागीहरुसँग कुरा गरेका छौँ ।
महेश भट्ट, अखिल (छैठौं) कञ्चनपुर जिल्ला अध्यक्ष
राष्ट्रियता रक्षाको लागि देश बचाउने अभियानमा हिँड्न पाउँदा धेरै खुशी लागेको छ । कार्यक्रम राम्रो थियो । हामी जहाँ–जहाँ पुग्यौं, जनताले निकै सपोर्ट गरे । अभियानलाई जनताले सकारात्मक रुपमा लिएका छन् । धेरै ठाउँमा हाम्रो यालीलाई स्वागत गरेका थिए ।
यसले सीमा अतिक्रमण विरुद्ध सबै उठ्ने माहोल बनेको मैले बुझेको छु । राष्ट्रियता रक्षाका लागि जनता सडकमा उभिन तयार छन् तर, नेतृत्वको खाँचो छ । जनताले हाम्रो पार्टी (राष्ट्रिय जनमोर्चा) प्रति विश्वास प्रकट गरेका छन् । त्यो आन्दोलनको नेतृत्व अब हामीले नै गर्नुपर्छ ।
अञ्जना मास्के, अनेमसंघ कैलाली जिल्ला सदस्य
रोमाञ्चक यात्रामा जनताको सपोर्ट पाउँदा अत्यन्त खुशी लाग्यो । बर्तमान सन्दर्भमा कालापानी, लिपुलेकलगायतका भूभाग भारतले आफ्नो कब्जामा पारेको र त्यस विरुद्ध जनता जागृत भइरहँदा हामीले सञ्चालन गरेको अभियानप्रति जनताले दिलदेखि नै स्वागत गरे । यसले एकातिर हाम्रो पार्टीप्रति जन विश्वास बढेको छ भने अर्कोतिर राष्ट्रियताप्रति जागरण पनि बढाएको छ ।
यात्राका क्रममा कतिपय साथीहरु तराईमा मात्रै मोटरसाइकल चलाएका र पहाडको अनुभव नभएका थिए । त्यसले गर्दा ठाउँ ठाउँमा साथीहरु लडे, कति घाइते भए । दार्चुलामा त प्रहरीले नै हाम्रो अभियानलाई अवरोध गर्यो । त्यसले गर्दा सजिलो बाटो छोडेर अप्ड्यारो भीरको बाटो हिँड्नुपर्यो । त्यहाँ पनि केही साथीहरुको मोटरसाइकल पल्टियो । समग्रमा यो अभियान एकदमै सकारात्मक रह्यो ।
अमिर कुँवर, युवक संघ कञ्चनपुर जिल्ला अध्यक्ष
हाम्रो अभियानले सुदूरपश्चिमका जनता सीमा अतिक्रमणको विरुद्ध उठ्ने माहोल बनेको छ । यसले सुदूरपश्चिममा मात्रै होइन देशैभर जागरण ल्याएको छ । जनताको कुरा सुन्दा राष्ट्रियता रक्षाका लागि २०६२/०६३ सालको जस्तै अर्को आन्दोलनको खाँचो महसुस भयो । जनता त्यसका लागि तयार छन् । तर, नेतृत्व तयार हुनुपर्यो । जनताको दबाब भयो भने सरकारले पनि अतिक्रमण हटाउन पहल गर्छ जस्तो लाग्छ ।
यो अभियानले हाम्रो पार्टीको संगठन नभएका ठाउँमा पनि हामी प्रति विश्वास जगाएको छ । जनता राजमोमा संगठित हुन चाहेका छन् । अब राष्ट्रियता रक्षासँगै संगठन निर्माणलाई पनि अघि बढाउनुपर्ने देखिन्छ । त्यो माहोल पनि बनेको छ ।
दयाराम सञ्ज्याल, राजमो कैलाली जिल्ला अध्यक्ष
यो राष्ट्रियताको सवाल भएका कारण जनस्तरबाट राम्रो रेस्पोन्स पाइयो । ठाउँ ठाउँमा जनताले स्वागत गरे । सुदूरपश्चिममा यसले नयाँ उर्जा ल्याएको छ । आम रुपमा राजमोको मुद्दासँग जनता जोडिएका छन् । यसले संगठन निर्माणको माहोल पनि बनाएको छ ।
