नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ ले अमेरिकी सहायता परियोजना एमसीसी तोप र गोला भन्दा पनि खतरनाक भएको बताउनुभएको छ।
शुक्रबार आठ राजनीतिक दलले काठमाडौंमा आयोजना गरेको विरोध सभालाई सम्बोधन गर्दै महासचिव विप्लवले एमसीसी कुनै विकास अनुदान नभएर विकासको नाममा आएको साम्राज्यवादी हस्तक्षेप भएको बताउनुभयो।
‘पहिला साम्राज्यवादीहरुले अगाडि अगाडि पानी जहाजमा व्यापारको लागि कपडा लिएर जान्थे र पछि पछि तोप लिएर जान्थे। कमजोर मुलुकहरुलाई हस्तक्षेप गरेर आफ्नो शासन लागू गर्थे’ उहाँले भन्नु भयो, ‘तर अहिले साम्राज्यवाद तोप लिएर जाँदैन। अगाडि सूचना प्रविधि लिएर जान्छ र पछि आणविक हतियार लिएर जान्छ। त्यसकारण यो एमसीसी तोप र गोला भन्दा पनि खतरनाक छ।’
उहाँले एमसीसी साम्राज्यावदी हस्तक्षेप हो भन्ने कुरा प्रचण्ड र माधव नेपालले पनि बुझेका बताउनुभयो।
तर, केही थान मन्त्री, सांसद र आउँदो स्थानीय चुनावको लागि साम्राज्यवादको अगाडि घुँडा टेकेको बताउनुभयो।
महासचिव विप्लवले एमसीसी कुनै पनि हालतमा लागू हुन नदिइने र खारेज गरेरै छाड्ने चेतावनी दिनुभयो।
यस्तै, उनले एमसीसी संसदबाट पास भएको फागुन १५ गतेलाई पुस १ जस्तै ‘कालो दिन’ को संज्ञा दिनुभयो।
‘जसरी पुस १ गते नेपालको इतिहासमा कालो दिनको रुपमा दर्ज भएको छ। त्यो बेला (विसं २०१७ साल) सामन्तवादले कू गरेको घटनालाई हामीले कालो दिन भनेर बुझेका छौँ। अहिले फागुन १५ गते त्यो भन्दा पनि कालो दिनको रुपमा दर्ज भएको छ। आफूलाई प्रजातन्त्रवादी भन्नेहरु, अझ कम्युनिष्ट भन्नेहरु, हँसिया हतौडाको बिल्ला भिरेकाहरुले देशलाई घात गरेका छन्।’
आजको सभा त्यही कालो दिन र साम्राज्यवादीसँग घुँडा टेक्ने कालामान्छेहरुको विरुद्ध भएको उहाँले बताउनु भयो।
उहाँले संसदलाई सार्वभौम भनिएपनि जनताको आवाजविरुद्ध गएर अमेरिकीहरुको भत्ता पचाउन कठपुतली भएको बताउनु भयो।
