काठमाडौं । सरकारले एमसीसीविरुद्ध काठमाडौंको नयाँ बानेश्वरमा फागु ८ र १२ गते सञ्चालित आन्दोलनका क्रममा गिरफ्तार नेता कार्यकर्तालाई झुठा मुद्दामा फसाउने षडयन्त्र गरेको छ ।
आन्दोलनका क्रममा गिरफ्तार नेकपा (क्रान्तिकारी माओवादी) का केन्द्रीय सदस्य वसन्त बोगटीसहित विभिन्न दलका एक दर्जन नेता कार्यकर्तालाई रिहा नगरी सरकारले भुठा मुद्दामा फसाउन खोजेको भन्दै आठ राजनीतिक संगठनले आपत्ति जनाएका छन् ।
शनिबार बसेको नेकपा (मसाल) सहति ६ दल र दुई मोर्चाको संयुक्त बैठकले गिरफ्तार नेता कार्यकर्ताको बिना सर्त रिहाईको माग गरेको छ । साथै, आन्दोलनमा गम्भीर घाइते हेमराज अवस्थीसहित सम्पूर्ण घाइतेको निशुल्क उपचार गर्न माग गरेको छ ।
जनसंघर्षको बलबाटै एमसीसी खारेज हुने विश्वासका साथ आन्दोलनलाई निरन्तरता दिने निर्णयसमेत बैठकले गरेको जारी विज्ञप्तिमा जनाइएको छ । त्यसक्रममा फागुन १५ र १६ गते उपत्यकामा संसद भवन घेराउ गर्ने र उपत्यका बाहिर जिल्ला प्रशासन कार्यालय घेराउको कार्यक्रम राखिएको छ ।
