काठमाडौं । एमसीसीविरुद्ध काठमाडौंको बिजुलीबजार क्षेत्रमा भएको प्रदर्शनका क्रममा गम्भीर घाइते भएका हेमराज अवस्थी खतरामुक्त रहेको प्रहरीले जनाएको छ ।
डडेलधुराका २७ वर्षीय अवस्थी बिहीबार बिजुलीबजार क्षेत्रमा घाइते भएका थिए । उनको टाउकोमा चोट लागेको छ ।
उनलाई सुरुमा राष्ट्रिय ट्रमा सेन्टरमा लगिएको थियो । पछि शल्यक्रियाका लागि अन्नपूर्ण न्युरो अस्पताल रेफर गरिएको थियो । गए राति नै उनको अन्नपुर्ण न्युरो अस्पतालमा शल्यक्रिया गरिएको छ । शल्यक्रिया सफल भएको र उनलाई भेन्टिलेटरबाट आईसीयूमा सारिएको तथा स्वास्थ्य अवस्था सुधारोन्मुख रहेको अस्पताल स्रोतले जनाएको छ ।
शल्यक्रियाका लागि अवस्थीलाई तीन पिन्ट ‘ओ’ नेगेटिभ रगत आवश्यक परेको थियो । जसमध्ये एक पिन्ट रगत प्रहरीजवान समीनाथ यादवले दिएका थिए ।
अवस्थी सत्तासाझेदार दल नेकपा (माओवादी केन्द्र) को कार्यकर्ता भएको खुलेको छ । काठमाडौंमा टीकाथलीमा बस्दै आएका उनी डडेलधुराको नवदुर्गा गाउँपालिका–५ का स्थायी बासिन्दा हुन् ।
उनका बुवा माओवादी केन्द्रका वडा सचिव रहेको पनि खुलेको छ । उनी काठमाडौंमा कोरियन भाषा अध्यापन गराउँदै आएको र घरजग्गा कारोबारमा पनि संलग्न रहेको खुलेको छ ।
अवस्थी अमेरिकी सहयोग परियोजना (एमसी) विरुद्धको आन्दोलनमा सुरुदेखि नै सक्रिय रहँदै आएका थिए ।
पछिल्लो केही दिनयता काठमाडौंमा एससीसीको विरोधमा निरन्तर प्रदर्शन हुँदै आएको छ । प्रदर्शनका क्रममा प्रहरी र प्रदर्शनकारीबीच झडप समेत हुँदै आएको छ ।
