काठमाडौँ । संस्कृति पर्यटन तथा नागरिक उड्डयन मन्त्रालयको दबाबपछि क्यासिनो सञ्चालकहरूले रोयल्टी बुझाउने क्रम बढेको छ ।
मन्त्री प्रेमबहादुर आलेको कडा निर्देशनपछि क्यासिनो सञ्चालन गरेबापत तिर्नुपर्ने रोयल्टी बुझाउने क्रम बढेको बताइएको छ ।
२०७८ फागुन ९ गते आइतबारसम्म सरकारको खातामा क्यासिनो कम्पनीबाट रु ८१ करोड राजस्व सङ्कलन भएको पर्यटन विभागले बतााएको छ ।का होटल तथा क्यासिनो हेर्ने अधिकृत खेमराज जोशीले बताए।
मन्त्री आलेले केही हप्तापहिले क्यासिनोको रोयल्टी नतिर्नेको लाइसेन्स खारेज हुने चेतावनी दिएसँगै अहिले क्यासिनो सञ्चालकले रोयल्टी तिर्न थालेका विभागको दाबी छ ।
पर्यटन विभागका अनुसार हालसम्म कम्तीमा पनि १७ कम्पनीले रोयल्टी तिर्नुपर्ने बक्यौता बुझाएका छन् भने गोल्डेन फिङ्गर गेमिङ जोन प्रालिले नयाँ क्यासिनो सञ्चालन गरेबापत रु दुई करोड ५० लाख रोयल्टी बुझाएसँगै सरकारको खातामा रु ८१ करोड रकम जम्मा भएको छ ।
विभागका अनुसार अब सरकारलाई क्यासिनो सञ्चालकले तिर्नुपर्ने बक्यौता रकम अझै पनि एक अर्ब ११ करोड ८४ लाख ४७ हजार छ ।
मन्त्री आलेकै निर्देशनमा क्यासिनोको रोयल्टी वर्षांैसम्म नतिर्ने काठमाडौँको दरबार मार्गमा रहेको होटेल याक एन्ड यतीको लाइसेन्स खारेज गरिएपछि अहिले अन्य क्यासिनो सञ्चालकले रकम तिर्न सुरु गरेको बताइन्छ ।
मन्त्री आलेकै निर्देशनपछि विभागले रोयल्टी नतिर्ने क्यासिनो सञ्चालकको तीनपुस्ते विवरणसमेत सार्वजनिक गरेको छ । अब छओटा कम्पनीले रोयल्टी नवीकरण दस्तुर बुझाउन बाँकी रहेको पर्यटन विभागले जनाएको छ ।
