डोटी । राष्ट्रिय जनमोर्चाका केन्द्रीय सदस्य एवं सुदूरपश्चिम इन्चार्ज मनोज भट्टले कालापानीबाट भारतीय सेना तुरुन्त हट्नुपर्ने बताउनुभएको छ । उहाँले हालै जारी गरेको जाली नक्शा पनि तत्काल सच्याउन चेतावनी दिनुभयो ।
राजमो सुदूरपश्चिम प्रदेश समितिले आयोजना गरेको ‘कालापानी अभियान’ अन्तर्गत आइतबार डोटीको दिपायलमा आयोजित विरोध सभालाई सम्बोधन गर्दै नेता भट्टले अहिलेसम्मका सरकारहरुले राष्ट्रियता भजाएर आफ्नो स्वार्थ पुरा गर्ने गरेको आरोप लगाउनुभयो । तर, भारतले आफ्नो उद्देश्य पुरा भएपछि ति पार्टी र नेतालाई उपयोग गरेर सत्ताबाट फाल्ने गरेको यथार्थ नभुल्न पनि सचेत गराउनुभयो ।
नेता भट्टले मातृका कोइराला, विपी र केपी ओलीबाट आफ्नो राष्ट्रिय स्वार्थ पुरा गरेपछि ति नेताहरुलाई सत्ताबाट फालेको उदाहरण पनि पेश गर्नुभयो । उहाँले इतिहासको त्यो तितो यर्थाथबाट ओली सरकारले शिक्षा लिनु पर्ने जरुरी रहेको पनि बताउनु भयो ।
‘निर्वाचनलाई ध्यानमा राखेर कालापानीको मुद्दा उठाइएको हो भने त्यो सरकारका लागि महंगो सावित हुनेछ’ नेता भट्टले भन्नुभयो ।
राष्ट्रिय जनमोर्चा डोटी जिल्ला सचिव केसवनाथ योगीको सञ्चालनमा अघि बढेको विरेध सभामा अखिल(छैठौं) का महासचिव महेश राज जोशी, राजमो कैलाली जिल्ला सदस्य डवल वोगटी र जातीय समता समाजका क्षेत्रीय सदस्य सिद्वराज विकले सम्बोधन गर्नुभएको थियो ।
सीमा अतिक्रमण विरुद्धको ‘कालापानी अभियान’ अन्तर्गत भोलि कञ्चनपुरको गुलरियामा विरोध सभा हुनेछ । १७ गते महेन्द्रनगरमा समापन समारोह हुने र सो सभालाई राजमोका अध्यक्ष चित्रबहादुर केसीले सम्बोधन गर्ने कार्यक्रम छ ।
मंसिर ११ गते धनगढीबाट सुरु भएको अभियान डडेल्धुरा, बैतडी, दार्चुला जिल्लाका विभिन्न क्षेत्रमा पुगि कार्यक्रम सम्पन्न गरेको छ ।
