दमक । एम.सी.सी. को विरुद्ध झापाको दमकमा सात वामपन्थी राजनीतिक दलहरूले प्रदर्शन तथा सभा सम्पन्न गरेका छन् । २०७८ फागुन ६ गते उनीहरूले सो कार्यक्रम सम्पन्न गरेका हुन् ।
कार्यक्रमपूर्व दमकको पशुहाटबाट विरोध प्रदर्शन सुरु भएको थियो । प्रदर्शन दमकचोक परिक्रमा गरी गणतन्त्र चोकमा आएर विरोधसभामा परिणत भएको थियो ।
सभामा मन्तब्य राख्दै राष्ट्रिय जनमोर्चा नेता देवेन्द्र पौडेलले एम.सी.सी. नेपाल र देशभक्त नेपालीका लागि घातक भएकाले यसको विरोधमा सबै जनता उठ्नुपर्ने धारणा राख्नुभयो ।
मन्तव्यको क्रममा उहाँले एम.सी.सी. खारेज नभए मुलुकको स्वाधीनताका लागि जस्तोसुकै मूल्य चुकाउन पछि नपर्ने चेतावनीसमेत दिनुभयो ।
विरोधसभामा देशभक्त जनगाणन्त्रिक मोर्चा झापाका सहसंयोजक गजेन्द्र निरौलाले देशको युरेनियम जस्ता खनिज पदार्थ लैजान दुई छिमेकी देश चीन र भारत विरुद्धको रणभूमि नेपाललाई बनाउन अमेरिकाले परियोजना दिने बहाना गरेकाले आम नेपाली जनतालाई सचेत हुन आग्रह गर्नुभयो ।
सभालाई माओवादी केन्द्रका नेता विमल र नेता आशिषलगायतले पनि सम्बोधन गर्नुभएको थियो ।
कार्यक्रमको आयोजना नेकपा (मसाल), राष्ट्रिय जनमोर्चा, नेकपा (क्रान्तिकारी माओवादी), देशभक्त जनगणतान्त्रिक मोर्चा, नेपाल कम्युनिस्ट पार्टी, वैज्ञानिक समाजवादी कम्युनिस्ट पार्टी र नेकपा (माओवादी केन्द्र समाजवादी) ले गरेका थिए ।
