काठमाडौँ । मिलेनियम च्यालेन्ज कर्पोरेसन (एम.सी.सी.) आज संसद्मा टेबल नहुने भएको छ ।
प्रधानमन्त्री शेरबहादुर देउवा र नेकपा (माओवादी केन्द्र) का अध्यक्ष प्रचण्डबिच प्रधानमन्त्री निवास बालुवाटारमा भएको छलफलमा एम.सी.सी. आज टेबल नगर्ने सहमति भएको हो ।
एम.सी.सी. को बारेमा छलफल गर्न फागुन ५ गते गठबन्धनको बैठक बस्ने भएको छ । प्रधानमन्त्री निवास बालुवाटारमा भोलि ३ बजेका लागि बैठक बोलाइएको हो ।
नयाँ बानेश्वरस्थित संसद् भवनमा कार्यव्यवस्था परामर्श समितिको बैठक बसिरहेकै बेला देउवा र प्रचण्डबिच बालुवाटारमा यस्तो सहमति भएको हो ।
सत्ता गठबन्धन नै भत्किने खतरा उत्पन्न भएपछि प्रधानमन्त्री शेरबहादुर देउवा एम.सी.सी. टेबल गर्ने तयारीबाट अन्ततः ब्याक भएको अनुमान गरिएको छ ।
सत्ता साझेदार दल माओवादी केन्द्रको बुधबार बसेको संसदीय दलको बैठकले संशोधन बिना एम.सी.सी. पारित हुन नसक्ने निर्णय गरेको थियो । जबरजस्ती एम.सी.सी. टेबुल गरिए सरकारबाटै बाहिरिने माओवादीले निष्कर्ष निकालेसँगै प्रधानमन्त्री देउवा ब्याक भएका हुन् ।
सत्ता गठबन्धनको अर्को दल नेकपा (एकीकृत समाजवादी) एम.सी.सी. ले पनि संशोधनको आवश्यकता औल्याएको छ । त्यसबारे सो पार्टी देशव्यापी प्रदर्शनसमेत गरिसकेको छ ।
सत्ता गठबन्धनमै रहेको जनता समाजवादी पार्टीले भने एम.सी.सी. को पक्षमा मतदान गर्ने दाबी नेपाली काङ्ग्रेसका नेताहरूले गरेका छन् । प्रतिनिधि सभामा १९ सिट रहेको जसपाका नेता डा. बाबुराम भट्टराई खुलेर एम.सी.सी.को पक्षमा लागेका छन् भने अध्यक्ष उपेन्द्र यादव मौन छन् । भट्टराईको पक्षमा ११ तथा यादवको पक्षमा आठ सांसद रहेको जसपाका नेताहरू बताउँछन् ।
यता, पाँचदलीय गठबन्धनमा रहेको राष्ट्रिय जनमोर्चा भने सुरुदेखि एम.सी.सी. खारेल गर्ने पक्षमा रहेको छ ।
