काठमाडौं । दक्षिण कोरियाले नेपाली श्रमिक लैजाने प्रक्रिया फेरि रोकेको छ । कोरिया सरकारले नेपालसहितका देशबाट श्रमिक लैजान रोक लगाएको हो ।
दक्षिण कोरियामा पुनः कोरोना संक्रमण दर तीब्र गतिमा फैलन थालेपछि प्रवासी श्रमिक लैजान रोक लगाएको छ ।
कोरियाको उक्त निर्णयका कारण ३ दिनपछि दक्षिण कोरिया जान लागेका नेपालीलाई समेत रोकिएको छ । उनीहरुको उडान तालिका तय भएको थियो ।
अर्को सूचना जारी नभएसम्मका लागि उनीहरुको उडान स्थगित भएको छ । उडान तालिका स्थगित गरिएको दक्षिण कोरियाको श्रम तथा रोजगार मन्त्रालयलाई उद्धृत गर्दै सउलस्थित नेपाली दूतावासले जानकारी गराएको हो ।
रोजगार अनुमति प्रणाली (ईपीएस) अन्तर्गत भाषा र सीप परीक्षा उत्तीर्ण गरी दक्षिण कोरिया जाने पर्खाइमा रहेका नेपाली श्रमिकहरु लामो समयदेखि रोकिएका थिए । त्यहाँ संक्रमण कम भएको लामो समयपछि उडान सुचारु भएपनि पुनः रोकिएको हो ।
रोजगार तथा सामाजिक सुरक्षामन्त्री कृष्णकुमार श्रेष्ठले वैदेशिक रोजगारका लागि दक्षिण कोरिया जान ईपीएस पास गरी लामो पर्खाइपछि १४ फेब्रअरीमा उडान तय भइ रोकिएका श्रमिकहरुलाई छिट्टै पठाउन पहल गर्ने बताउनुभयो । मन्त्री श्रेष्ठले संक्रमण दर कम हुनासाथ रोकिएका श्रमिकहरुलाई तत्काल पठाउने व्यवस्था हुने विश्वास दिलाउनुभयो ।
