काठमाडौं । भारतले दार्चुलास्थित महाकाली नदीमा बनाइरहेको पक्की तटबन्धबारे नेपाललाई जवाफ दिन आलटाल गरिरहेको छ । करिब एक महिनाअघिदेखि नै तटबन्ध निर्माणको काम भइरहेपनि भारतले अझै जवाफ नदिएको हो ।
महाकालीको बहाव नेपालतर्फ फर्किनेगरी बनिरहेको तटबन्ध निर्माबारे जिल्ला प्रशासन कार्यालय दार्चुलाले भारतीय पक्षसँग जवाफ मागेपनि उसले वेवास्ता गर्दै आएको छ । सिमानामा पक्की संरचना बनाउन दुवै देशको सहमति चाहिन्छ । तर, भारतले अटेर गरेरै धमाधम तटबन्ध बनाइरहेको छ । यसले महाकालीको बहाव नेपालतर्फ फर्कने र फेरि ठूलो नोक्सानी हुनसक्ने त्रास बढेको छ ।
भारतले एकतर्फी रुपमा धमाधम संरचना निर्माण गर्न थालेपछि जिल्ला प्रशासन कार्यालय दार्चुलाले नेपाल र भारतका सीमा अधिकारीको बैठक आयोजना गर्दै तटबन्धको विषयमा भारतको ध्यानाकर्षण गराएको छ । बिहीबार दार्चुला जिल्ला प्रशासन कार्यालयले दार्चुला, बैतडी र भारतको पिथौरागढका अधिकारीबीच भर्चुअल माध्यममार्फत बैठक आयोजना गरेको थियो।
बैठकमा नेपालसँग नसोधी नदीको बहाव सदरमुकाम खलङ्गातिर फर्किने गरी महाकाली नगरपालिका–४ मा भारतले मनलाग्दी पक्की तटबन्ध बनाएको विषय प्राथमिकता साथ उठाइएको प्रमुख जिल्ला अधिकारी दीर्घराज उपाध्यायले जानकारी दिनुभयो ।
उहाँका अनुसार नेपालतिर केही असर नपर्ने गरी तटबन्ध बनाउन आग्रह गरिएको र उनीहरुले पानीको बहावमा केही असर नपर्ने गरी तटबन्ध निर्माण भइरहेको बताएका थिए ।
भारतीय पक्षले आफूखुसी तटबन्ध निर्माण थाल्दा दार्चुला प्रशासनले त्यसबारे जानकारी दिन पत्राचार गरे पनि जवाफ फर्काएको थिएन। नेपाली प्रशासनसँग समन्वय नगरेर भारतीय पक्षले एकतर्फी रुपमा महाकालीमा पक्की तटबन्ध निर्माण गरिरहेको छ।
यो पनिः महाकालीमा धमाधम पक्की तटबन्ध बनाउँदै भारत, नेपाल मुकदर्शक
