प्युठान । प्यूठानमा बेहुली लिएर फर्कंदै गरेको सवारी जीप दुर्घटना हुँदा आठ जनाको मृत्यु भएको छ। शुक्रबार राति ग १ ज ५०९३ नम्बरको जीप गौमुखी गाउँपालिका–६ ओखरपाटामा दुर्घटना हुँदा आठ जनाको मृत्यु भएको गौमुखी गाउँपालिका अध्यक्ष विष्णु कुमार गिरीले जानकारी दिनुभएको छ ।
दुर्घटनामा बेहुला बेहुलीसहित पाँचजना गम्भीर घाइते भएका छन्। उनीहरुको जिल्ला अस्पताल बिजुवारमा उपचार भइरहेको जिल्ला प्रहरी कार्यालय प्यूठानले जनाएको छ।
दुर्घटनाग्रस्त जीप सडकदेखि करिब ३ सय मिटर तल खोलामा खसेको छ। दुई जनाको उपचारको क्रममा प्यूठान अस्पतालमा मृत्यु भएको हो।
प्युठानको नौबहिनी गाउँपालिकाको लुङबाट बेहुली लिएर गौमुखी गाउँपालिकाको लिवाङ फर्किंदै गरेको जिप गौमुखी– ६ ओखरपाटामा दुर्घटनामा परेको हो।
मृत्यु हुनेहरु गौमुखी गाउँपालिका–६ का स्थानीय हुन्। दुर्घटनामा ज्यान गुमाउने ४० वर्षीया बसन्ती खड्का, ११ वर्षीया बालिका यलिसा खड्का, ३० वर्षीया केशरी खड्का, करिब ५० वर्षीय बलबहादुर बुढामगर, ३२ वर्षीय खिमबहादुर खत्री, ३९ वर्षीय बसन्त खड्का र ५० वर्षीय नन्दि खड्काको सनाखत भएको छ।
मृत्यु हुने श्रीमान बसन्त खड्का, श्रीमती बसन्ता खड्का, छोरी एलिशा खड्का एकै घरका हुन् ।
दुर्घटनामा ६ जनाको घटनास्थलमै र दुई जनाको अस्पताल लैजाँदा बाटोमै मृत्यु भएको हो । करिब २२ वर्षीया युवतीको अझै सनाखत हुन नसकेको प्रहरीले जनाएका छ ।
जिल्ला प्रहरी कार्यालय प्युठानका अनुसार बेहुला २५ वर्षीय दानबहादुर खड्का र बेहुली २० वर्षीया रीमा बिसीको अवस्था चिन्ताजनक छ । उनीहरुको जिल्ला अस्पतालमा उपचार भइरहेको छ।
