दार्चुला । राष्ट्रिय जनमोर्चा सुदूरपश्चिम प्रदेश समितिले आयोजना गरेको ‘कालापानी अभियान’ अन्तर्गत शुक्रबार दार्चुला सदरमुकाम खलंगामा विरोध सभा सम्पन्न भएको छ । नेपाल–भारत सीमा महाकाली नदीले छुट्याएको दार्चुला सदरमुकामबाट राजमोले सीमा अतिक्रमण विरुद्ध भारतलाई खबरदारी गरेको छ ।
शुक्रबार अपारान्ह खलंगा पुग्नै लाग्दा अभियान टोलीलाई प्रहरीले रोक्ने प्रयास गरेको थियो । तर, प्रहरीको अवरोध छिचोल्दै मोटरसाइकल -याली खलंगा पुगी विरोध सभा गरेको हो ।
सभालाई सम्बोधन गर्दै राष्ट्रिय जनमोर्चाका कन्द्रीय सदस्य मनोज भट्टले भारतलाई कालापनीबाट सेना फिर्ता लैजान र नेपालको भूभाग अतिक्रमण गरेर बनाएको नक्सा सच्याउन चेतावनी दिनुभयो ।
यस्तै, राजमोका केन्द्रीय सदस्य एवं सुदूरपश्चिम प्रदेश समितिका अध्यक्ष नन्दराज भट्टले सीमा अतिक्रमणको विरुद्ध जनतालाई सचेत पार्न आएको राष्ट्रवादी टोलीलाई अवरोध गरेको भन्दै प्रशासनको विरोध गर्नुभयो ।
भारतसँगै सिमाना जोडिएको खलंगामा भारतप्रति अत्यधिक निर्भरता रहेका कारण भारतीय पक्ष नचिढिउन् भन्ने उद्देश्यले प्रहरीले अभियानप्रति अवरोध गरेको थियो । तर, विरोध सभामा उपस्थित स्थानीयको ठुलो उपस्थितिले दार्चुलाका जनताको राष्ट्रियताको भावनालाई प्रतिविम्वित गरेको थियो ।
लक्षीराम आचार्यले सञ्चालन गर्नुभएको कार्यक्रममा लालबहादुर जाग्री, राजाराम चौधरी, विरेन्द्र भणडारी, हरि लम्साल, शिवराज रेग्मी, पदम ओली, केशवनाथ योगीलगायतका नेताहरुले सम्बोधन गर्नुभएको थियो ।
कार्यक्रमको अध्यक्षता राजमो दार्चुलाका अध्यक्ष मनबीर दमाई र स्वागत सचिव उमेश महराले गर्नुभएको थियो ।भीरको असजिलो तथा पानी परेको चिप्लो बाटोबाट अभियान टोली अघि बढ्दै जाँदा मोटरसाइकल लडेर पाँ जना घाइते भएका थिए । उनीहरुको दार्चुला सदरमुकाममा सामान्य उपचार गरिएको छ ।
अभियान टोली भोलि बैतडी सदरमुकाम गोठालापानी फर्कनेछ । जहाँ विरोध सभा गर्ने कार्यक्रम छ ।
