काठमाडौँ । राष्ट्रिय जनमोर्चा तनहुँका उपाध्यक्ष महेन्द्रबहादुर सापकोटाले राजमो तनहुँको लेटरहेड दुरूपयोग गरिएको बताउनुभएको छ ।
आज २०७८ माघ १७ गते राजमो तनहुँको नाममा कथित वक्तव्य जारी गरिएपछि उहाँले सो अभिव्यक्ति दिनुभएको हो ।
‘आज राजमो तनहुँको नामबाट जारी गरिएको प्रेसवक्तव्य सङ्गठनको लेटरहेडको दुरूपयोग हो’ युगदर्शनसितको कुराकानीमा उपाध्यक्ष सापकोटाले भन्नुभयो– ‘हामी कथित वक्तव्यमा उल्लेख गरिएको निर्णयप्रति सहमत छैनौँ ।’
कथित वक्तव्यमा जिल्ला समितिको बैठकले निर्णय गरेको भनिए त्यस्तो कुनै बैठकले यस खालको निर्णय नगरेको दाबी सापकोटाले गर्नुभयो ।
उपाध्यक्ष सापकोटाले भन्नुभयो– ‘हामी चित्रबहादुर केसी अध्यक्ष र मनोज भट्ट महासचिव रहनुभएको राष्ट्रिय जनमोर्चामै आबद्ध छौँ ।’
त्यस्तै, जिल्ला समितिका सदस्यहरू जुनी थापा, पूर्ण थापा र शिव अधिकारीले पनि आफूहरूलाई जिल्ला समितिको बैठकबारे जानकारी नभएको तथा त्यस बैठकले गरेको निर्णयबारे आफूहरूको असहमति रहेको बताउनुभयो ।
युगदर्शनसित सङ्क्षिप्त प्रतिक्रियामा उहाँहरू तीनै जनाले पनि आफूहरू चित्रबहादुर केसी अध्यक्ष र मनोज भट्ट महासचिव रहनुभएको राष्ट्रिय जनमोर्चामै आबद्ध रहेको प्रष्ट्याउनुभयो ।
