काठमाडौं । पाँच दलीय गठबन्धनले आगामी २०७९ जेठ महिनाभित्र स्थानीय तहको निर्वाचन गर्न सरकारलाई सुभाव दिएको छ । शनिबार दोस्रो पटक बसेको कानुनविदसहितको बैठकले जेठभित्रै निर्वाचन गर्न सरकारलाई सुझाव दिने निर्णय गरेको सरकारका प्रवक्ता सूचना तथा सञ्चार प्रविधिमन्त्री ज्ञानेन्द्रबहादुर कार्की जानकारी दिनुभयो ।
बैठकपछि सञ्चारकर्मीसँग कुरा गर्दै मन्त्री कार्कीले भन्नुभयो, ‘आगामी जेठ महिनाभित्र स्थानीय चुनाव सम्पन्न गर्ने गरी आवश्यक तयारी थाल्न सरकारलाई सुझाव दिने निर्णय बैठकले गरेको । त्यसका लागि आवश्यक संविधान र कानुन संशोधनसहितका प्रक्रिया पनि अघि बढाउन सरकारलाई सुझाव दिएको छ ।
मन्त्री कार्कीका अनुसार निर्वाचन मिति तोक्नका लागि सरकार र गठबन्धनले निर्वाचन आयोगसँग आवश्यक परामर्श गर्ने छन् ।
‘निर्वाचन मिति तोक्न सरकारलाई निर्वाचन आयोगसँग छलफल थाल्न गठबन्धन बैठकले सुझाव दिएको छ’ उहाँले भन्नुभयो, ‘जेठ महिनाभित्र स्थानीय तहको निर्वाचन सम्पन्न गर्ने दिशामा गठबन्धन अघि बढेकाो छ ।’
गठबन्धनका कतिपय नेताहरुले आगामी वर्षको काक्तिक मंसिरसम्म स्थानीय निर्वाचन गर्न सकिने बताउने गरेका थिए भने समयमै निर्वाचन गर्न सरकारलाई चौतर्फी दबाब बढेको थियो ।
निर्वाचन आयोगले मिति घोषणाका लागि सरकारलाई पटक–पटक ताकेता गरेको थियो भने राष्ट्रपति विद्यादेवी भण्डारीले पनि बिहीबार प्रधानमन्त्री शेरबहादुर देउवालाई पत्र पठाएर निर्वाचन सार्ने नाममा संविधान र कानुन गरिने संशोधन निराशाजनक हुने बताउनुभएको थियो ।
