काठमाडौं । नेपाल पत्रकार महासंघले पत्रकार लालबहादुर (एलबी) विश्वकर्माको निधन हुनुमा अस्पतालको गम्भीर लापरवाही औँल्याएको छ ।
महासंघले गठन गरेको अध्ययन समितिले सिभिल अस्पतालको लापरवाहीका कारण पत्रकार विश्वकर्माले ज्यान गुमाएको प्रतिवेदन सार्वजनिक गरेको हो ।
टिभी टुडे टेलिभिजनमा कार्यरत वरिष्ठ संवाददाता एलबीको २५ वर्षको उमेरमा माघ ६ गते निधन भएको थियो । बिरामी भएर सिभिल अस्पताल भर्ना भएका पत्रकार एलबीका आफन्तसँग पैसा नभएको थाह पाएपछि अस्पतालले उपचार नगरी पाटन अस्पताल रिफर गरेको थियो ।
‘बिरामीसँग पैसा नभएको थाहा पाएपछि अस्पतालले बिरामीको संवेदनशील अवस्था बुझेर उनको ज्यान बचाउनेभन्दा उनीबाट उपचारको शुल्क असुल हुन नसक्ने अवस्था बुझेपछि बेवास्ता र लापरवाही सुरू गरेको देखिन्छ’ महासंघले गठन गरेको अध्ययन समितिले भनेको छ ।
महासंघले सो घटनाबारे अध्ययन गर्न केन्द्रीय सदस्य रामकृष्ण अधिकारी, शिवराज खत्री र प्रकाश धौलाकोटी रहेको तीन सदस्यीय अध्ययन समिति गठन गरेको थियो।
महासंघले पत्रकार विश्वकर्माको परिवारलाई तत्काल राहतस्वरुप ५० हजार रुपैयाँ उपलब्ध गराउने निर्णय गरेको छ।
साथै, मृतकसँग आश्रित परिवार (श्रीमती र साढे ३ वर्षको छोरा) को हेरविचारका लागि श्रीमतीलाई जीवन निर्वाहका लागि रोजगारी र बच्चाको उच्च शिक्षासम्मको पढाईको जिम्मेवारी लिनका लागि उनी कार्यरत रहेको सञ्चार गृह र सम्बन्धित पक्षलाई महासंघले आग्रह गरेको छ ।
