काठमाडौं । अपेन्डिसाइटिसको शल्यक्रिया गरिएका प्रधानमन्त्री केपी शर्मा ओली अझै एक हप्ता अस्पताल बस्ने भएका छन् । ओलीको उपचारमा संलग्न चिकित्सकहरुले एक सातामा उनी डिस्चार्ज हुने जानकारी दिएका छन्।
ओलीको उपचारमा संलग्न शिक्षण अस्पताल महाराजगञ्जस्थित मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरका चिकित्सकहरुले उनको अवस्था खतरामुक्त रहेको जानकारी दिएका छन् ।
प्रधानमन्त्री ओलीको पुनः मिर्गौला प्रत्यारोपण गर्नेबारे छलफल भइरहेको बताइएको छ । अपेन्डिसाइटिसको शल्यक्रिया गरिएको तीन दिनपछि पत्रकार सम्मेलन गरी चिकित्सकले प्रधानमन्त्रीको मिर्गौला प्रत्यारोपण गर्न कुनै समस्या नरहेको पनि स्पष्ट पारे ।
यसअघि १२ वर्ष अघि उनको मिर्गौला प्रत्यारोपण गरिएको थियो । त्यो मिर्गौलाले राम्रो काम गर्न छोडेको छ ।
प्रधानमन्त्रीकी निजी चिकित्सक समेत रहेकी डा. दिव्यासिंह शाहले प्रधानमन्त्री ओलीको मिर्गौला प्रत्यारोपणमा कुनै हतारो नभएको बताइन् ।
यो अप्रेसनले मिर्गौला प्रत्यारोपणमा कुनै असर नगर्ने पनि उनले बताइन् ।
उनले नेपालमै मिर्गौला प्रत्यारोपण गर्न सक्षम रहेको पनि स्पष्ट पारिन्। ‘प्रत्यारोपण नेपालमा पनि हुनसक्छ, बाहिर पनि हुनसक्छ। तर, हामी नेपालमै गर्न सक्षम छौँ’ उनले भनिन् ।
