काठमाडौं । भौतिक पूर्वाधारमन्त्री रेणु यादवले जनमत पार्टीका अध्यक्ष सिके राउतको हत्या गर्ने धम्की दिएकी छन् । उपेन्द्र यादव नेतृत्वको जनता समाजवादी पार्टी (जसपा की यादवले गौर नरसंहारको स्मरण गर्दै सिके राउतको हत्या गर्ने चेतावनी दिएकी हुन् ।
बुधबार रौतहट सदरमुकाम गौरमा बलिदानी दिवसको अवसरमा आयोजित कार्यक्रमलाई सम्बोधन गर्दै उनले गौर नरसंहारको पुनरावृत्ति गर्ने अभिव्यक्ति दिएकी हुन्।
‘गौर नरसंहारको इतिहास राइस मिल जिवीत छ । तुफानसँग टकराउने प्रयास गर्यो भने त्यहि हालत हुन्छ । जुन गौरको राइस मिलमा भएको थियो’ हिन्दी भाषामा उनले भनिन्, ‘त्यो इतिहासलाई राउतले नभुलुन्। नत्र तपाइँको कार्यकर्ता मारिन्छन् र तपाइलाई पनि घेराबन्दी गरेर मारिदिन्छन् । हत्या हुन्छ । सतर्क रहनुस् ।’
२०६३ साल चैत ७ गतेका दिन गौरको राइस मिलमा तत्कालिन उपेन्द्र यादव नेतृत्वको मधेशी जनअधिकार फोरम र माओवादी समर्थित मधेसी राष्ट्रिय मुक्ति मोर्चाबीच झडप हुँदा माओवादीका २७ कार्यकर्ताको हत्या भएको थियो ।
सो घटनालाई गौर नरसंहार भनेर चिनिन्छ । मन्त्री रेणु यादवले सोही घटना स्मरण गर्दै सिके राउतलाई पनि त्यसरी नै घेराबन्दी गरेर मारिदिने चेतावनी दिएकी हुन् । स्वतन्त्र मधेशको नाममा भूमिगत संघर्ष गर्दै आएको सिके राउतको जनमत पार्टी हाल शान्तिपूर्ण राजनीति गरिरहेको छ ।
