कपिलवस्तु । कपिलवस्तुका विभिन्न विद्यार्थी संगठनहरुले विद्यार्थीलाई यातायातमा ४५ प्रतिशत भाड छुट दिने निर्णय कार्यान्वयन गर्नुपर्ने लगायतका माग राखी प्रमुख जिल्ला अधिकारीलाई ज्ञापन पत्र बुझाएका छन् ।
अखिल (छैठौं), अनेरास्ववियु (क्रान्तिकारी), अनेरास्ववियु र अखिल (क्रान्तिकारी) ले प्रमुख जिल्ला अधिकारी चक्रपाणि पाण्डेलाई सो ज्ञापन पत्र बुझाएका अखिल (छैठौं) का जिल्ला अध्यक्ष सञ्जिला बुढाले जानकारी दिनुभयो ।
विद्यार्थीहरुले आधारभूत तहसम्म निशुल्क, अनिवार्य र माध्यमिक तहसम्म निशुल्क शिक्षा कार्यान्वयनको माग गरेका छन् । साथै, एउटै छानामुनी रहेको विद्यालयमा अंग्रेजी र नेपाली माध्यमबाट पठनपाठन गर्ने, गराउने प्रवृत्तिले वर्गिय खाडललाई झन प्रोत्साहन गरेको भन्दै यसको अन्त्यको माग पनि गरिएको छ ।
यस्तै, कोभिड–१९ को तेस्रो लहरबाट बच्न स्वास्थ्य मापदण्डको पालना गर्न/गराउन, शितलहरबाट विद्यार्थी र जनतालाई बचाउन माग गरिएको छ । साथै विद्यार्थीहरुले महंगी, भ्रष्टाचार र कालाबजारी नरोकिए आन्दोलन गर्ने चेतावनीसमेत दिएका छन् ।
