काठमाडौं । नेपालले संकटग्रस्त अफगानिस्तानलाई मानवीय सहायता सामग्री पठाएको छ । आइतबार विहान १४ टन औषधि र लत्ताकपडा बोकेको हिमालयन एयरलाइन्सको चार्टड जहाजबाट नेपाली टोली राजधानी काबुल प्रस्थान गरेको छ ।
गत अगस्टमा तालिबान सत्तामा आएपछि अफगानिस्तानका जनता ठूलो मानवीय संकटबाट गुज्रिएरहेकाले नेपालले मानवीय सहायता पठाउन लागेको परराष्ट्रमन्त्री नारायण खड्काले बताउनुभयो । यद्यपी सरकारले तालिबानलाई मान्यता नदिएका कारण सो सहायता सामग्री तालिबान सरकारलाई हस्तान्तरण नगरी काबुलस्थित संयुक्त राष्ट्रसंघीय वरिष्ठ अधिकारीको जिम्मा लगाउने उहाँले जानकारी दिनुभयो ।
आज त्रिभुवन अन्तर्राष्ट्रिय विमानस्थलमा परराष्ट्रमन्त्री डा. नारायण खड्काले पत्रकार सम्मेलन गरी परराष्टमन्त्री खड्काले नेपालले अहिलेसम्म अफगानिस्तानको तालिबान सरकारलाई वैधता नदिएको, विशुद्ध त्यहाँ संकटमा नागरिकलाई मानवीय सहायता मात्रै दिन लागिएको बताउनुभयो ।
‘नेपाली टोलीले सहायता सामग्री सिधै तालिबान सरकारलाई हस्तान्तरण नगरी काबुलस्थित संयुक्त राष्ट्रसंघीय वरिष्ठ अधिकारीको जिम्मा लगाउने’ मन्त्री खड्काको भनाइ छ।
परराष्ट्रमन्त्री खड्काका अनुसार अफगानिस्तानका २ करोड ७० लाख मानिस मानवीय सहयोगको पर्खाइमा छन्। तीमध्ये ३० लाख बालबालिका कुपोषणबाट ग्रस्त छन्।
गत अगस्टमा अफगानिस्तानमा तालिबान सत्तामा आएयता विभिन्न मुलुकले मानवीय सहायता सामग्री पठाइरहेका छन्।
तालिबानले सत्ता कब्जा गरेपछि अफगानिस्तानका तत्कालीन राष्ट्रपति असरफ गनी देशै छाडेर भागेका थिए । अहिले उनी सपरिवार यूएईको शरणमा बसिरहेका छन्। त्यसयता अफगानिस्तानमा मानवीय संकट उत्पन्न भएको छ।
