काठमाडौँ । अखिल (छैठौं) सहित आन्दोलनरत विभिन्न विद्यार्थी सङ्गठनहरूले चिकित्सा शिक्षामा सुधारको माग गर्दै शिक्षा, विज्ञान तथा प्रविधिमन्त्री देवेन्द्र पौडेललाई ज्ञापनपत्र बुझाएका छन् ।
विद्यार्थी सङ्गठनहरूले चिकित्सा शिक्षा आयोगले तोकेकोभन्दा बढी शुल्क लिई एम.बी.बी.एस, बी.डी.एस र बी.एन. एस. मा नोबेल मेडिकल कलेज, काठमाडौँ मेडिकल कलेज, मणिपाल मेडिकल कलेजले विद्यार्थीहरूसँग बढी शुल्क लिएको भन्दै शिक्षामन्त्रीलाई ज्ञापन पत्र बुझाएका हुन् ।
उनीहरूले शिक्षा जस्तो अत्यावश्यक सेवा आफ्नो चङ्गुलमा राख्ने र विद्यार्थीको अधिकार र भविष्यमा प्राप्त सफलतामाथि अङ्कुश लगाउन खोजेको आरोप लगाएका छन् ।
विद्यार्थी सङ्गठनको ज्ञापनपत्र बुझ्दै शिक्षामन्त्री देवेन्द्र पौडेलले माफियाहरूबाट राज्य नडराउने बताउनुभयो । उहाँले कानुनसम्मत काम नगरी विद्यार्थीबाट जथाभावी शुल्क लिएको पाइए कानुनबमोजिम कारबाही गर्ने बताउनुभयो ।
मन्त्री पौडेलले कुनै पनि शक्तिले केन्द्रमा धाएर वा सरकारलाई दबाब दिएर कानुन विपरीतका काम गरे मन्त्रालयले छुट नदिने भन्दै सम्बन्धित युनिभर्सिटीका प्रतिनिधिलाई बोलाएर आज वा भोलिसम्म समस्याको समाधानमा लाग्ने बताउनुभयो ।
उहाँले राज्यका निकायलाई धम्क्याउने, अनावश्यक प्रयोग, परिचालन गर्ने, कानुन आफ्नो हातमा लिने, कानुन विपरीत काम गर्ने, शक्तिकेन्द्रहरू धाएर कानुन विपरीतका काम ढाकछोप गर्न खोज्ने प्रकारको प्रवृत्तिलाई शिक्षा मन्त्रालयले सहन नसक्ने बताउनुभयो ।
त्यस्तै, चिकित्सा शिक्षा आयोगका उपाध्यक्ष प्रा.डा. श्रीकृष्ण गिरीले आयोगको तर्फबाट गर्नुपर्ने कामका लागि आयोग पछि नहट्ने बताउनुभयो । उहाँले सुरुका दिनदेखि नै आयोगले अनियमित कुरालाई नियमित गर्न लागि परेको बताउनुभयो । उहाँले बेथिति सुधारको अभियानमा उठाइएका हरेक आवाज आयोगको भएको बताउनुभयो ।
