काठमाडौं । अखिल (छैठौं) सहित विभिन्न सात विद्यार्थी संगठनहरुले मेडिकल कलेजले लिएको चर्को शुल्कबारे गृहमन्त्री बालकृष्ण खाँणको ध्यानाकर्षण गराएका छन् । मंगलबार मन्त्रालयमा ज्ञापन पत्र बुझाउँदै उनीहरुले मेडिकल कलेजको ज्यादतीमाथि छानबिन गर्नसमेत माग गरेका छन् ।
विद्यार्थी संगठनले चिकित्सा शिक्षाअन्तर्गत एमबीबीएस, बीडीएस र बीएनएस अध्ययनमा मेडिकल कलेजले लिएको शुल्कबारे छानबिन गर्न माग गरेका हुन् । सो मागका सम्बन्धमा गराएको ध्यानाकर्षणलाई आफूले गम्भीरतापूर्वक लिएको गृहमन्त्री खाँणले बताउनुभएको छ । सात विद्यार्थी संगठनले आज मन्त्रालयमा बुझाएको ध्यानाकर्षण पत्र बुझ्दै मन्त्री खाँणले यस सम्बन्धमा परामर्श गरेर अघि बढ्ने आश्वासन दिनुभयो ।
ध्यानाकर्षणपत्र बुझाउनेमा अखिल (छैठौं), नेपाल विद्यार्थी संघ, अखिल क्रान्तिकारी, अनेरास्ववियू, समाजवादी विद्यार्थी युनियनगायत विद्यार्थी संगठन थिए । मन्त्री खाँणले शिक्षा मन्त्रालयमार्फत यो विषय आएमा आफूलाई सहज हुने र शिक्षा मन्त्रीलाई पनि ध्यानाकर्षण गराउन आग्रह गर्नुभएको थियो ।
विद्यार्थी संगठनले चिकित्सा शिक्षाअन्तर्गत एमबीबीएस, बीडीएस र बीएनएस अध्ययनमा नोबेल मेडिकल कलेज, काठमाडौँ मेडिकल कलेज, मणिपाल मेडिकल कलेजले चिकित्सा शिक्षा आयोगले तोकेको भन्दा बढी शुल्क लिएर ज्यादति गरेको भन्दै छानबिन गरी दोषी भेटिए कारबाही गर्न माग गरेका छन् ।
