काठमाडौं । शेर्पा आउटडोरको केटीएम सिटीले माघ १५ गते सर्वाधिक पुरस्कार राशीको केटीएम रन आयोजना गर्ने भएको छ । केटीएम रन पुरुष र महिला गरि दुई स्पर्धामा सञ्चालन हुने आयोजकले जनाएको छ ।
प्रतियोगिताको विजेताले ट्रफी सहित समान १ लाख रुपैयाँ प्राप्त गर्नेछन् । यो पुरस्कार १० किलोमिटर स्पर्धामा अहिलेसम्मकै सर्वाधिक पुरस्कार राशी भएको आयोजकले जनाएका छन् । दोस्रो हुने दुवै स्पर्धाका खेलाडीले समान ५० हजार, तेस्रोले ३० हजार, चौथो हुनेले २० हजार, पाँचौं हुनेले १० हजार, छैटौं हुनेले समान ५ हजार रुपैयाँ प्राप्त गर्नेछन् । सातौंदेखि दशौं स्थान प्राप्त गर्ने खेलाडीले गिफ्ट भौचर प्राप्त गर्नेछन् ।
केटीएम रनको रुट समेत निश्चित भैसकेको छ । दरबारमार्गबाट सुरु हुने दौड घण्टाघर, भद्रकाली, शहीद गेट, त्रिपुरेश्वर, थापाथली, माइतीघर, बबरमहल, बानेश्वर हुँदै फर्किएर माइतीघर, थापाथली, त्रिपुरेश्वर, न्युरोड, जमल हुँदै पुनः दरबारमार्ग आएर समापन हुनेछ ।
राष्ट्रिय फुटबल टिमको मुख्य प्रायोजक रहेको केटीएम सिटीले एथलेटिक्सको लामो दूरीको दौडलाई केन्द्रित गरेर केटीएम रन पहिलो पटक आयोजना गर्न लागेको हो ।
केटीएम रनको दर्ता आज (मंगलबार)बाट खुला गरिएको छ । आयोजक केटीएम सिटीले अनलाइनमार्फत आजबाट खेलाडी दर्ता गर्न सकिने जनाएको छ । केटीएम रन डट कममा गएर खेलाडीले आफ्नो नाम दर्ता गर्न सक्नेछन्।
