काठमाडौं । नेपाल कम्युनिष्ट पार्टी (माओवादी केन्द्र)को अध्यक्षमा पुष्पकमल दाहाल प्रचण्ड निर्वाचित हुनुभएको छ । माओवादी केन्द्रको सोमवार बसेको नवनिर्वाचित केन्द्रीय कमिटीको बैठकले पार्टी अध्यक्षमा दाहाललाई सर्वसम्मत् रुपले चयन गरेको छ ।
केन्द्रीय कमिटीको पहिलो बैठकमा नवनिर्वाचित केन्द्रीय सदस्यहरुले सपथग्रहण गरेसँगै अध्यक्षमा दाहाललाई चयन गरिएको हो । पार्टी अध्यक्षको जिम्मेवारी पाएसँगै बैठकलाई सम्बोधन गर्दै अध्यक्ष दाहालले आफ्नो काँधमा ठूलो जिम्मेवारी थपिएको बताउनुभयो ।
उहाँले अध्यक्षको सपथ लिदाँ राष्ट्र र जनताप्रति आभारी भएको महशुस गरेको भन्दै पुनः एकपटक राष्ट्र र जनताको सेवा गर्ने अवसर पाएको बताउनुभयो । अध्यक्ष दाहालले पार्टीलाई रुपान्तरण गर्न र सुदृढ बनाउन आफुले अझै पार्टीको नेतृत्व गर्नुपर्ने महशुस गरेको बताउनुभयो ।
अध्यक्ष दाहालले आफूबिनाको माओवादी पार्टीको भविष्यबारे अनेक टिकाटिप्पणी हुने गरेको भन्दै आफू नहुँदैमा माओवादी आन्दोलन नसिद्धिने पनि बताउनुभयो । माओवादी आन्दोलन आफु बिनापनि जिवित रहने र शक्तिका साथ अगाडि बढ्ने उहाँले विश्वास व्यक्त गर्नुभयो ।
उहाँले पार्टी अध्यक्षको हैसियतले देशको सेवा गर्न आफ्नो लागि यो कार्यकाल अन्तिम अवसर र अन्तिम चुनौती भएको पनि बताउनुभयो ।
पुस ११ गतेदेखि सुरु भएको माओवादी केन्द्रको आठौं महाधिवेशन २३७ सदस्यीय केन्द्रीय समिति चयन गर्दै हिजो सम्पन्न भएको हो । १५ पदाधिकारी रहने माओवादीले अध्यक्ष मात्रै घोषणा गरेको हो । २९९ सदस्यीय केन्द्रीय समितिमा बाँकी केन्द्रीय सदस्य मनोनित गर्न बाँकी छ भने अध्यक्ष बाहेकका पदाधिकारी छनौट पनि बाँकी नै छ ।
