काठमाडौं । राष्ट्रिय जनमोर्चाले नेपालको अनुमतिबिना दार्चुलाको कालापानी क्षेत्रमा भारतको उत्तराखण्डका गभर्नरले भ्रमण गरेको भन्दै आपत्ति जनाएको छ ।
सोमबार विज्ञप्ति प्रकाशित गरी अध्यक्ष चित्रबहादुर केसीले उत्तराखण्ड राज्यका राज्यपाल (गभर्नर) कालापानी क्षेत्रमा पर्ने नाभी, कुटी, गुञ्जीको भ्रमण गरेको समाचारप्रति गम्भीर आपत्ति प्रकट गर्नुभएको हो ।
सो घटनाले नेपालको सार्वभौमिकतामाथि भारतले ठाडै चुनौति दिएको भन्दै अध्यक्ष केसीले घटनाबारे सत्यतथ्य बाहिर ल्याउन र आफ्नो धारणा स्पष्ट पार्न पनि सरकारसँग माग गर्नुभएको छ ।
त्यसबारे नेपाल सरकार अहिलेसम्म मौन रहेकोमा उक्त घटनाको सत्यतथ्य बाहिर ल्याउन र त्यसबारे आफ्नो धारणा सार्वजनिक गर्न माग गरिएको छ ।
यस्तो छ वक्तव्यः
‘केही भारतीय तथा नेपाली संचार माध्यमहरुमा भारतको उत्तराखण्ड राज्यका राज्यपाल (गभर्नर) नेपालको दार्चुला जिल्लास्थित कालापानी क्षेत्रमा पर्ने नाभी, कुटी, गुञ्जीको भ्रमण गरेको समाचारप्रति हाम्रो पार्टी राष्ट्रिय जनमोर्चाले गम्भीर आपत्ति प्रकट गर्दछ ।
उत्तराखण्ड राज्यका गभर्नरले उक्त क्षेत्रमा गई विगतमा भारतले नेपाली भूमि अतिक्रमण गरी निर्माण गरेको सडकको पनि निरिक्षण गरेको कुरा समाचार माध्यममा आएको छ ।
त्यसको घोर विरोध तथा भत्र्सना गर्दछौं । कालापानी क्षेत्रका उक्त गाउँहरु नेपालको सार्वभौमिकताभित्र पर्दछन् । नेपालको अनुमति विना त्यसप्रकारको भ्रमणले नेपालको सार्वभौमिकता तथा अखण्डतालाई भारतले ठाडै चुनौति दिएको छ । त्यसबारे नेपाल सरकार अहिलेसम्म मौन रहेकोमा उक्त घटनाको सत्यतथ्य बाहिर ल्याउन र त्यसबारे आफ्नो धारणा सार्वजनिक गर्न माग गर्दछौं ।’
धन्यवाद !
मितिः २०७८ पौष १९ गते
चित्रबहादुर के.सी.
अध्यक्ष
