काठमाडौँ । नेपाल मजदुर किसान पार्टीका नेता प्रेम सुवालले श्रीलङ्काले जस्तै नेपालले पनि एम.सी.सी. खारेज गरेर फिर्ता पठाउनुपर्ने बताउनुभएको छ । सो सम्झौता संसद्मा पेससमेत नगर्न सरकार र सांसदहरूलाई दबाब दिन नेमकिपाले २०७८ पुस १६ गते शुक्रबार काठमाडौँ खबरदारी सभाको आयोजना गरेको हो ।
खबरदारी सभामा सांसद सुवालले एम.सी.सी. राष्ट्रघाती भएको बताउनुभयो । उहाँले श्रीलङ्काले एम.सी.सी. सम्झौता राष्ट्रिय सुरक्षाका लागि खतरा रहेको निष्कर्ष निकाल्दै खारेज गरे जस्तै नेपालले पनि खारेज गर्नुपर्ने बताउनुभयो ।
सुवालले सो सम्झौता राष्ट्रघाती भन्दै संसद्मा पेस गर्न नदिन सांसदहरूलाई अपिल गर्नुभयो । उहाँले सो सम्झौता खारेज नभएसम्म आफूहरूले आन्दोलन जारी राख्ने चेतावनी दिनुभयो ।
नेता सुवालले एम.सी.सी. सम्झौता संसद्बाट पारित भए भारत र अमेरिकी सेनाको नेपाल परेडस्थल बन्ने र एक सेकेन्डमै नेपाल ध्वस्त हुने दाबीसमेत गर्नुभयो । उहाँले एम.सी.सी. सम्झौँता गरेर देशलाई घात गर्नेहरूलाई सबैले चिन्नुपर्ने पनि बताउनुभयो ।
खबरदारी सभामा देशघाती एम.सी.सी. सम्झौता खारेज गर लगायतका नाराबाजी लगाउँदै प्रदर्शन गरिएको थियो । नेमकिपाले शुक्रबार नयाँ बानेश्वरको तीनओटा चोकहरूमा पर्चा, पम्प्लेटसहित एम.सी.सी. सम्झौता विरुद्ध जुलुस तथा सभा सम्पन्न गरेको थियो ।
कोटेश्वरबाट आएकाहरू सिभिल अस्पतालअगाडि, माइतीघरबाट आएकाहरू एभरेस्ट होटलअगाडि र पुरानो बानेश्वरबाट आएकाले पानी ट्याङ्की अगाडि एम.सी.सी. विरुद्ध सभा गरेका थिए ।
