काठमाडौं । अखिल (छैठौं) सहित विभिन्न सात विद्यार्थी संगठनहरूले चिकित्सा शिक्षामा अत्यधिक शुल्क लिइएको भन्दै आपत्ति जनाएका छन् । मेडिकल कलेजले विभिन्न बहानामा ब्रम्हलुट मच्चाइरहेको आरोप लगाउँदै विद्यार्थी संगठनले तोकेभन्दा बढी शुल्क नलिन चेतावनी दिएका छन् ।

शुक्रबार संयुक्त विज्ञप्ति प्रकाशित गरी सात विद्यार्थी संगठनले मेडिकल कलेजहरुले सरकारले ताकेभन्दा बढी शुल्क लिएकोमा कडा आपत्ति जनाएका हुन् । विज्ञप्तिमा मेडिकल शिक्षालाई सहज बनाउन र सरकारले तोकेभन्दा बढी शुल्क अशुल गरिए आन्दोलन गर्ने चेतावनी दिइएको छ ।

नेविसंघ, अखिल (क्रान्तिकारी), नेकपा एकीकृत समाजवादी निकट अनेरास्ववियु, जसपा निकट समाजवादी विद्यार्थी युनियन, वैद्य निकट अखिल (क्रान्तिकारी), विप्लव निकट अखिल (क्रान्तिकारी र अखिल (छैठौं) ले संयुक्त विज्ञप्ति प्रकाशित गरी मेडिकल कलेजहरुले विभिन्न बहानामा लुट मच्चाइरहेको आरोप लगाएका छन्।

यस्तो छ, संयुक्त प्रेस विज्ञप्ति
राष्ट्रियता, जनजीविका र नेपाली विद्यार्थीहरुको साझा मुद्दामा क्रियाशिल संयुक्त विद्यार्थी संगठन, आज लाखौं युवा विद्यार्थीहरुको शैक्षिक सवालमा आन्दोलित छ । नेपालका मेडिकल कलेजहरुले बिगत लामो समयदेखि चिकित्सा क्षेत्रका विद्यार्थीहरु माथि विभिन्न बहानामा लुट मच्चाई रहेका छन् ।

यसैको शृङ्खलाको रुपमा चिकित्सा शिक्षा आयोगले तोकेको मापदण्ड विपरीत काठमाडौ विश्वविद्यालयका सम्बन्धन प्राप्त मेडिकल कलेजहरु काठमाडौं मेडिकल कलेज सिनामंगल, नोबेल मेडिकल कलेज मोरङ र मणीपाल मेडिकल कलेज कास्कीले २०७८ को नयाँ भर्नामा एमबीबीएस, बीडीएस र बी नर्सिङमा राज्यले तोकेको भन्दा बढी विद्यार्थीहरुबाट आफूखुशी विभिन्न बहानामा लाखौं रुपैयाँ नाजायज शुल्क लिएको गुनासो आएको र मणिपाल मेडिकल कलेज पोखरा, काठमाडौ मेडिकल कलेज, नोवेल मेडिकल कलेज मोरङमा विद्यार्थीहरु आन्दोलित भएकोप्रति संयुक्त विद्यार्थी संगठनको गम्भीर ध्यानाकर्षण भएको छ ।

चिकित्सा शिक्षाका विद्यार्थीहरुको जायज मागहरुमा ऐक्यबद्धता जाहेर गर्दै विद्यार्थीहरु लाई सहज वातावरणमा भर्ना र पठनपाठन गराउन जोडदार माग गर्दछौं, अन्यथा विद्यार्थीहरुको पक्षमा सयुक्त विद्यार्थी संगठनले आन्दोलन गर्ने र यस बाट उत्पन्न हुने परिणाम स्वयं कलेजले भोग्नु पर्ने छ भन्ने छ जानकारी पनि यसै विज्ञप्ति मार्फत जनकारी गराउदछौं ।

हार्दिक अभिवादन सहित
राजिव ढुंगाना, अध्यक्ष, ने.वि.संघ
पञ्चा सिंह, अध्यक्ष, अखिल (क्रान्तिकारी)
सुदेश पराजुली, अध्यक्ष, अनेरास्ववियू
रुपनारायण श्रेष्ठ, अध्यक्ष, समाजवादी विद्यार्थी यूनियन
हरिकृष्ण गजुरेल,अध्यक्ष, अखिल (क्रान्तिकारी)
प्रकाश शाही, अध्यक्ष, अखिल (क्रान्तिकारी)
देवेन्द्र कुँवर, अध्यक्ष अखिल (छैठौं)