काठमाडौं । नेकपा (माओवादी केन्द्र) का महाधिवेशन प्रतिनिधिले पदाधिकारी हलबाटै चयन गर्न माग गरेका छन् । पार्टीको काठमाडौंमा जारी आठौं महाधिवेशनमा समूहगत सुझाव पेश गर्दै प्रतिनिधिहरुले पदाधिकारी चयन गर्न पाउनुपर्ने माग गरेका हुन् ।
महआधिवेशन हलबाट केन्द्रीय समिति र अध्यक्ष मात्र चयन गर्ने चर्चा चलेपछि प्रतिनिधिहरुले पदाधिकारी पनि हलबाटै चयन गर्न माग राखेका छन् ।
कर्णाली प्रदेशबाट आफ्नो समूहको सुझाव पेश गर्दै बिमला केसीले बन्दसत्र चलिरहेको हलबाटै अध्यक्ष सहितको पदाधिकारी चयन गर्न माग गर्नुभयो ।
‘यही हलबाट पार्टीको पदाधिकारी चयन गरियोस, त्यसका लागि प्रक्रिया थालिनुपर्छ’ समूहको सुझाव पेश गर्दै केसीले भन्नुभयो्, ‘महाधिवेशन हलबाट सबै पदाधिकारी टुंगो लगाउनु पर्छ। पछिलाई राख्न पाइँदैन।’
आठौं महाधिवेशन अन्तर्गत जारी बन्द सत्रमा अध्यक्ष प्रचण्डले सोमबार पेश गरेको राजनीतिक प्रतिवेदनमाथि सुझाव दिन बनाइएको २५ समूहबाट सुझाव दिने क्रम जारी छ । मंगलबारदेखि समूहले छलफल गरेर आज टोली नेताले प्रचण्डसहितका नेताहरू समक्ष सुझाव प्रस्तुत गरेका हुन्।
माओवादी नेतृत्वले बन्दसत्रको हलबाट केन्द्रीय सदस्यहरु मात्रै टुंगो लगाउने र केन्द्रीय समिति बैठकले पदाधिकारी चयन गर्ने गरी तयारी गरेको छ । तर, प्रतिनिधिहरुले हलबाट अध्यक्षसहितका सबै पदाधिकारी चयन गर्नुपर्ने बताएका छन् ।
माओवादीले अध्यक्ष, वरिष्ठ उपाध्यक्षसहित सात उपाध्यक्ष, महासचिव, दुई उपमहासचिव, तीन सचिव र एक कोषाध्यक्ष गरी १५ जना पदाधिकारीसहित २९९ सदस्यीय केन्द्रीय समिति निर्माण गर्न प्रस्ताव गरेको छ ।
११ समूहले दिए सुझाव
अध्यक्ष पुष्पकमल दाहाल प्रचण्डले पेश गरेको राजनीतिक प्रतिवेदनमाथि बुधबार ११ समूहले सुझाव पेश गरेका छन् । प्रतिवेदन अध्ययन गरी सुझाव पेश गर्न बनाइएका २५ मध्ये ११ समूहले सुझाव दिएका हुन् ।
बाँकी १४ समूहले भोलि बिहीबार आफ्नो समूहमा उठेको सुझाव र प्रतिक्रिया प्रस्तुत गर्नेछन् । आठौं राष्ट्रिय महाधिवेशनमा प्रचण्डले सोमबार ४५ पृष्ठको राजनीतिक प्रतिवेदन प्रस्तुत गर्नुभएको थियो ।
