कञ्चनपुर । अखिल नेपाल शिक्षक संघ, कञ्चनपुरको अध्यक्षमा श्री सिद्धेश्वरी मावि बेलौरी (शिवनगर) का प्रधानअध्यापक टेकेन्द्र शाह चयन हुनुभएको छ । शनिबार कञ्चनपुरको दक्षिणी क्षेत्रस्थित शोभातालमा भएको दोस्रो सम्मेलनपछिको प्रथम भेलाले शाहको अध्यक्षतामा नयाँ समिति चयन गरेको हो ।
समितिको उपाध्यक्षमा भानदेव भट्ट र सचिव मानबहादुर चौधरी चयन हुनुभएको छ । यस्तै, सहसचिवमा देवराज भट्ट, कोषाध्यक्षमा रामस्वरुप चौधरी र सहकोषाध्यक्षमा बृहस्पती चौधरी चयन हुनुभएको छ ।
सदस्यहरुमा जया अधिकारी, लक्ष्मीप्रसाद सोती, यादेवेन्द्र कुँवर, खुशीराम चौधरी र कालीराम चौधरी चयन हुनुभएको छ । हाल दुई स्थान रिक्त राखिएको छ । सल्लाहकारमा महेन्द्रबहादुर बस्नेत, पूर्णबहादुर गुरुङ र धनीदत्त अवस्थी चयन हुनुभएको छ ।
यस्तै, भेलाले केन्द्रीय प्रतिनिधिमा रामबहादुर बोहरा, तारामणि न्यौपाने र बन्धुराम बडायकलाई चयन गरेको छ भने प्रदेश प्रतिनिधिमा वसन्त नेपाली र सुन्दरलाल चौधरी चयन हुनुभएको छ ।
अध्यक्ष टेकेन्द्र शाह
अध्यक्ष पूर्णबहादुर गुरुङको अध्यक्षता तथा उपाध्यक्ष रामबहादुर बोहराको स्वागतबाट अघि बढेको भेलाको सञ्चालन सचिव तारामणि न्यौपानेले गर्नुभएको थियो । भेलाको उद्घाटन संघका केन्द्रीय सदस्य बन्धुराम बडायकले गर्नुभएको थियो ।
कार्यक्रममा राष्ट्रिय जनमोर्चाका केन्द्रीय परिषद सदस्य हरिकृष्ण पाण्डे र कञ्चनपुर जिल्ला अध्यक्ष रामबहादुर कार्कीले भेला सफलताको शुभकामना दिनुभएको थियो । त्यसक्रममा उहाँहरुले आफ्नो पार्टीको नाम बेचेर केही व्यक्तिहरु अवसरवादी पार्टीमा पलायन भएको उल्लेख गर्दै अवसरवादीहरुलाई कार्यकर्ता र जनताले उचित जवाफ दिनुपर्ने बताउनुभयो ।
कार्यक्रममा राजमो प्रदेश सचिव राजाराम चौधरी, जिल्ला सचिव अहिमान थापा, अखिल नेपाल महिला संघकी नेत्री लक्ष्मी चौधरीलगायतको आतिथ्यता रहेको थियो ।
कार्यक्रममा शिक्षकहरुले बर्तमान शिक्षा नीति, शिक्षक र शैक्षिक क्षेत्रसँग सम्बन्धित समस्या, तथा जनताका आधारभूत समस्याबारे शिक्षकहरुले खेल्नसक्ने भूमिका लगायतका विषयमा छलफल गर्नुभएको थियो । भेला उत्साहका साथ सम्पन्न भएको राजमो जिल्ला अध्यक्ष रामबहादुर कार्कीले जानकारी दिनुभयो ।
