शंकरप्रसाद पोख्रेर, प्युठान ।
नेपाल कम्युनिष्ट पार्टी (मसाल) का महामन्त्री मोहनविक्रम सिंहले प्युठानको नारीकोट पुगेर खगुला गुरुङको स्मरण गर्नुभएको छ ।
राष्ट्रिय जनमोर्चा, प्युठानले आयोजना गेरेको प्रशिक्षण कार्यक्रममा महामन्त्री सिंहले प्युठानको नारिकोट कम्युनिष्टहरुको ऐतिहासिक थलो भएको बताउनु भयो ।
उहाँले नारिकोटमा आफू र खगुलाल गुरुङले कम्युनिष्ट आन्दोलन शुरु गरेकोले स्मरण गर्दै यो एउटा ऐतिहासिक थलो भएको बताउनु भएको हो ।
२००७ साल देखि नेपालको प्रजातान्त्रिक आन्दोलनमा सहभागी भएका सिंह र गुरुङ २०१० सालमा सँगै नेपाल कम्युनिस्ट पार्टीको सदस्य बन्नुभएको थियो ।
सिंहले गुरुङसँग मिलेर २०१० सालमा प्युठानमा कम्युनिष्ट पार्टी स्थापना गर्नुभएको थियो भने २०११ सालमा प्यूठानको नारीकोटमा सिंहको नेतृत्वमा चलेको ऐतिहासिक किसान आन्दोलनको गुरुङ एउटा प्रमुख नेता हुनुहुन्थ्यो ।
सो आन्दोलनमा विरोध प्रदर्शन गर्न प्यूठानको सदरमुकाम जाने सिलसिलामा राति बास बसेको अवस्थामा मोहनविक्रम सिंह, रुमबहादुर पाण्डे, नन्दलाल गुरुङ, सिद्धिमान सिंह, नेपाली कांग्रेसका हेमराज पण्डित सहित खगुलाल गुरुङ पनि गिरप्तारीमा पर्नुभएको थियो ।
गिरप्तार भएपछि उहाँहरुलाई करिब १८ महिनासम्म पाल्पा र सल्यान गरी विभिन्न जेलमा चलान गरिएको थियो ।
२०१५ सालको आम निर्वाचनमा गुरुङ रोल्पा क्षेत्रबाट नेकपाको उम्मेदवार बन्नुभएको थियो । गुरुङको गएको असोज ३ गते १०४ वर्षको उमेरमा निधन भएको थियो ।
प्रशिक्षण कार्यक्रममा महामन्त्री सिंहले ती ऐतिहासिक दिनको स्मरण गर्दै राष्ट्रिय राजनीतिका अहिले पनि प्रतिगमनको खतरा रहेको उल्लेख गर्नुभयो । उहाँले त्यसका विरुद्ध एकजुट हुनुपर्ने पनि बताउनु भयो । त्यस्तै पार्टीका सबै नेता कार्यकताहरुलाई अनुशासित भएर काम गर्न आग्रह पनि गर्नुभयो ।
राष्ट्रिय जनमोर्चाको एकदिने राजनीतिक प्रशिक्षण प्युठानको गौमुखी गाउँपालिका– ७ नारिकोटमा सम्पन्न भएको हो ।
कार्यक्रममा महामन्त्री सिंहसिहत झिमरुक गाउँपालिकाका अध्यक्ष तथा राजमो प्रदेश नेता तिलक जिसी, नेकपा (मसाल) प्युठानका प्रवक्ता ज्ञामुराम न्यौपानेले समसामयिक विषयमा प्रशिक्षण दिनुभएको थियो ।
राजमो गौमुखी –७ का उपाध्यक्ष हुकुमबहादुर थापको अध्यक्षता, अखिल नेपाल युवक संघ गौमुखीका अध्यक्ष वीर बहदुर केसीको सञ्चालन तथा गौमुखी ७ नारिकोटका जनप्रतिनीधि ज्ञानबहादुर कुँवरको स्वागत मन्तव्यबाट प्रशिक्षण कार्यक्रम अगाडि बढेको थियो ।
कार्यक्रममा, राजमोका स्थानीय नेताहरु गोविन्द पुरी, पूर्वजनप्रतिनीधि लेखबहादुर जिसी, अखिल नेपाल माहिला संघकी मधु जिसी, राजमो झिमरुक गाउँपालिकाका अध्यक्ष सिद्दिमान जिसी, युवक संघ प्युठानका सचिव बरुणध्वज मल्ल, अखिल नेपाल महिला संघ नारिकोटकी अध्यक्ष सीता थापा लगायतको उपस्तिथि रहेको थियो।
