काठमाडौं । नेपाल कम्युनिष्ट पार्टी (मसाल) ले नेकपासँग भएको चुनावी तालमेलको सहमति कार्यान्वयन नभएको भन्दै असन्तुष्टि जनाएको छ । बाग्लुङमा नेकपाले इमान्दारीपूर्वक सहमति कार्यान्वयन गरेपनि प्युठानको सन्दर्भमा इमान्दारिता नदेखिएको मसालले जनाएको छ ।
महामन्त्री मोहन विक्रम सिंहले सोमबार विज्ञप्ति जारी गरी दुई पार्टीको केन्द्रीय तहमा भएको सहमति कार्यान्वयन गर्ने दायित्व पनि केन्द्रीय नेताहरुकै भएको स्पष्ट पार्नुभएको छ । प्युठानको बरौंलामा नेकपाले सहमति अनुसार राजमोलाई सहयोग नगरे परस्पर अविश्वास सृजना गर्ने पनि महामन्त्री सिंहले बताउनुभएको छ।
स्मरणीय छ, नेकपा र राजमोबीच उपनिर्वाचनमा तालमेल गरेर जाने सहमति भएको थियो । त्यसअनुसार बाग्लुङ क्षेत्र नं २(ख) प्रदेश सभा र प्युठानको ऐरावती गाउँपालिका वडा नं २ मा राजमोलाई नेकपाले सघाउने सहमति भएको हो । तर, प्युठानमा नेकपाले स्वतन्त्र हैसियतमा आफ्ना कार्यकर्तालाई उम्मेद्वार बनाएर निर्वाचनको प्रचार प्रसार गरिरहेको छ ।
राजमोले भने दुई क्षेत्र बाहेक अन्य सबै ठाउँमा नेकपालाई सहयोग गरिरहेको जनाएको छ ।
महामन्त्री सिंहले सोमबार जारी गर्नुभएको वक्तव्यको पुर्ण पाठ
आगामी मंसीरमा हुने बिभिन्न तहका उपनिर्वाचनहरुबारे हाम्रो र नेकपाको केन्द्रीयतहमा सहमति भएको थियो । त्यस अनुसार बाग्लुङको बुर्तिबाङको प्रदेशसभाको उपनिर्वाचन तथा प्यूठानको बरौलाको वडा अध्यक्षको चुनावमा उनीहरुले हामीलाई समर्थन गर्ने र केन्द्र,प्रदेश र स्थानीय तहका अन्य सबै निर्वाचनहरुमा हामीले उनीहरुलाई समर्थन गर्ने सहमति भएको थियो ।
जहाँसम्म हाम्रो प्रश्न छ, हामीले आफ्नो प्रतिवद्धतालाई पूरै पालन गरेका छौँ । कतिपय स्थानीय तहका चुनावहरुमा हाम्रा कतिपय समर्थकहरुले उम्मेदवारी दिएपनि नेकपासित भएको सहमतिलाई पालन गर्नका लागि हामीले आफ्ना कतिपय उम्मेदवारहरुलाई उम्मेदवारी फिर्ता गर्न लगाएका छौँ वा उम्मेदवारी दिन चाहेका अन्य कतिपय समर्थकहरुलाई पनि त्यसो गर्न रोकेका छौँ ।
त्यसका लागि हामीलाई खुसी लागेको छ कि, बाग्लुङको वुर्तिवाङको प्रदेश उपनिर्वाचनमा नेकपाले इमान्दारिता र दृढतापूर्वक आफ्नो प्रतिवद्धतालाई पालन गरेको छ । तर प्यूठानको बरौलामा हामीसित भएको सहमतिलाई खुला प्रकारले उलङ्घन गरिएको छ । त्यहाँ नेकपाका तर्फबाट कुनै आधिकारिक उम्मेदवारी दिइएको छैन । तैपनि त्यहाँ उनीहरुको तर्फबाट उम्मेदवार बनेको स्वतन्त्र व्यक्तिलाई त्यहाँको नेकपाको जिल्ला नेतृत्वले जिताउनको लागि आफ्नो पूरा शक्ति लगाएको छ ।
त्यो सङ्गठनका जिल्लाका प्रमुख नेता तथा कार्यकर्ताहरु राष्ट्रिय जनमोर्चाको उम्मेदवारलाई हराउन पूरै लागिरहेका छन् । त्यो वास्तवमा केन्द्रीय स्तरमा भएको सहमतिको पूरा उलङ्घन हो । त्यसले उनीहरुको अत्यन्त अविश्वसनीय र निम्न राजनीतिक स्तरलाई बताउँछ । त्यसलाई हाम्रो पार्टीले कडा शब्दमादुःख र क्षोभ प्रकट गर्दछ ।
हाम्रो समझदारी नेकपाको केन्द्रीय तहमा भएको थियो । त्यसकारण प्यूठानबारे केन्दीय स्तरमा भएको सहमतिलाई कार्यान्वयन गर्न नेकपाको केन्द्रीय नेतृत्वको दायित्व हुन्छ । यदि त्यसरी प्यूठानको बरौलाको वडाध्यक्षको चुनावबारे भएको सहमतिलाई कार्यान्वयन गरिएन भने त्यसले परस्परमा अविश्वासको वातावरण सृजना गर्ने छ । हामीले आशा गर्दछौँ, त्यस्तो हुने छैन ।
यो पनि पढ्नुहोस्ः चुनावी तालमेलप्रति प्युठानमा नेकपा कति इमान्दार ?
