काठमाडौं । शिक्षक सेवा आयोगले अहिलेसम्मकै धेरै शिक्षकलाई एकैपटक नियुक्ति दिने गरी तयारी थालेको छ । बुधबार मात्रै माध्यमिक तहका लागि एक हजार ५ सय ४४ शिक्षकको पदपूर्तिका लागि खुला विज्ञापन आह्वान गरेको आयोगले पुस तेस्रो साताभित्र थप साढे १५ हजार शिक्षकको पदपूर्तिका लागि विज्ञापन आह्वान गर्न लागेको हो ।
आगामी महिना थप १५ हजार ६८५ जना शिक्षकको विज्ञापन खोल्ने तयारी गरेको आयोगले जनाएको छ । आयोगका प्रवक्ता सुदर्शन मरहठ्ठाका अनुसार तीनै तह गरी आयोगले १७ हजार २३२ जना शिक्षकका लागि आवेदन खुलाउन लागेको हो। यसअघि २०७५ मा खोलिएको आवेदनको प्रावि तहमा ९ हजार ९९६, माविमा १ हजार ९७ र निमाविमा १ हजार ५७४ जना गरी १२ हजार ६६७ जनाको आवेदन खुलाइएको थियो।
प्रवक्ता मरहठ्ठाका अनुसार मावि पश्चात अब हप्ता–दस दिनको फरकमा निमाविमा २ हजार ५९६ र प्राविमा १३ हजार ८९ जना शिक्षकको पदपूर्तिका लागि विज्ञापन गर्न लागिएको छ। यसपल्ट आयोगले पहिलोपल्ट अनलाइन प्रणालीबाट आवेदन दिन सकिने व्यवस्था गरेको छ । माविमा मात्रै ३ लाख जनाले आवेदन दिनसक्ने अनुमान आयोगको छ ।
शिक्षा नियमावलीमा भएको संशोधनअनुसार यसपल्ट सामान्य र विषयगत गरी २०० पूर्णाङ्कको लिखित परीक्षा हुनेछ। चैत्र १५ गतेलाई तोकिएको मावि तहको सामान्य परीक्षा १०० पूर्णांकको हुन्छ। त्यसमा कम्तीमा ५० अंक ल्याउने परीक्षार्थी विषयगत परीक्षामा सामेल हुन पाउनेछन्। सामान्य परीक्षामा ल्याइएको पूर्णाङ्कको ५० प्रतिशत नम्बर विषयगत परीक्षामा जोडेर नतिजा निकालिने आयोगले जनाएको छ ।
आयोगले प्रदेश १ को मोरङ, प्रदेश २ को धनुषा, बागमतीको मकवानपुर, गण्डकीको कास्की, लुम्बिनीको दाङ, कर्णालीको सुर्खेत र सुदूरपश्चिम प्रदेशको कैलालीमा परीक्षा केन्द्र रहने व्यवस्था गरेको छ। पहिलो परीक्षा भएको दुई महिना उत्तरपुस्तिका जाँच गर्न समय लाग्ने र विषयगत परीक्षा र नतिजा गरी कम्तीमा ६ महिनामा शिक्षक नियुक्ति गरिसक्ने लक्ष्य आयोगले लिएको छ।
यसपल्ट परीक्षार्थीले मावि तहमा लिएको मुख्य विषयअनुसार फारम भर्न पाउँछन्। गणित, विज्ञान, लेखालगायतमा केही विषयमा अध्यापन अनुमतिपत्र अनिवार्य गरिए पनि तालिममा छुट गरिएको छ ।
