काठमाडौँ । पुबुदु दसानायके फेरि नेपाली राष्ट्रिय क्रिकेट टिमको प्रशिक्षकमा नियुक्त भएका छन् । नेपाल क्रिकेट सङ्घ (क्यान) को बोर्ड मिटिङले शनिबार दोस्रो पटक पुबुदुलाई प्रशिक्षकमा अनुमोदन गरेको हो ।
पुबुदु यसअघि सन् २०११ देखि २०१५ सम्म नेपालको प्रशिक्षक रहिसकेका छन् । उनकै प्रशिक्षणमा नेपालले २०१४ को टी–२० विश्वकप खेलेको थियो । गत सेप्टेम्बरमा डेभ वाटमोरले राजीनामा दिएपछि प्रशिक्षकविहीन रहेको नेपाली क्रिकेट टिमले करिब तीन महिनापछि नयाँ मुख्य प्रशिक्षक पाएको छ ।
क्यानले मुख्य प्रशिक्षक पदका लागि दरखास्त आह्वान गरेकोमा ६० जनाले आवेदन दिएका थिए । त्यसमध्ये १५ जना सर्टलिस्ट गरेको क्यानले अन्तिम चरणमा पाँच जनाको अन्तर्वार्ता लिएको थियो । त्यसमध्ये क्यानडाका पुबुदुसँगै भारतका मोन्टी देसाई प्रशिक्षकको होडमा अघि थिए । तर अन्तिममा क्यानले पुबुदुलाई नै फेरि नेपालको प्रशिक्षक चयन गरेको छ ।
नेपालले २०२२ को फेबु्रअरीमा टी–२० विश्वकपको ग्लोबल छनोट खेल्दै छ । प्रशिक्षक पुबुदको पहिलो काम ग्लोबल छनोट हुने छ ।
