प्युठान । राष्ट्रिय जनमोर्चा, प्युठानले जिल्लाका विभिन्न स्थानीय तहमा विशेष संगठनात्मक अभियान सञ्चालन गरिरहेको छ । तत्कालिन राजनीतिक परिस्थितिका बारेमा आम कार्यकर्ता तथा जनतालाई सचेत पार्ने उद्देश्यले सो अभियान सञ्चालन गरिएको अखिल नेपाल किसान महासंघका केन्द्रीय उपाध्यक्ष चन्द्रबहादुर केसीले बताउनुभयो ।
उहाँका अनुसार माण्डवी गाउँपालिका र स्वर्गद्वारी नगरपालिकाका विभिन्न स्थानमा कार्यक्रम सञ्चालन भइरहेको छ । त्यसक्रममा स्वर्गद्वारी नगरपालिका वडा नं ४ गोठिबाङ र भिङ्ग्री, वडा नं ७ र वडा नं ९ तथा माण्डवी गाउँपालिकाको लामाचौर, राम्दी, वाजिपुरलगायतका स्थानमा प्रशिक्षका कार्यक्रम सम्पन्न भएको छ ।
ती कार्यक्रममा किसान नेता केसीले देशको समसामयिक राजनीति, एमसीसी, संघीयता, पार्टीको आगामी योजना र आर्थिक अभियानलगायतका विषयमा स्पष्ट पार्नुभएको थियो ।
कार्यक्रम अन्तर्गत यही मंसिर २६ गते स्वर्गद्वारी नगरपालिकाको भिङ्ग्रीमा नगरस्तरीय भेलाको आयोजना गरिएको छ । सोही दिन भिङ्ग्रीमा एमसीसी विरुद्ध विरोध सभाको आयोजना गरिएको छ । यस्तै, २६ गते नै झिमरुक गाउँपालिकाको मच्छीमा पनि एमसीसीविरुद्ध विरोध सभा हुने छ ।
