काठमाडौं । भारत, अमेरिका र बेलायतका लागि प्रस्तावित नेपाली राजदूतको नाम संसदीय सुनुवाइ समितिबाट अनुमोदित भएको छ ।
सोमबार बसेको समितिको बैठकले तीन देशका प्रस्तावित राजदूत क्रमशः शंकर शर्मा, श्रीधर खत्री र ज्ञानचन्द्र आचार्यको नाम सर्वसम्मत अनुमोदन गरेको हो ।
समितिका सभापति लक्षमण लाल कर्णका अनुसार समितिले राजदूत सिफारिस समावेशी बनाउन पनि सरकारलाई निर्देशन दिएको छ ।
सुनुवाइका क्रममा सांसदहरुले प्रस्तावित राजदूतलाई विभिन्न जिज्ञाशा राखेका थिए । अमेरिकाका लागि प्रस्तावित राजदूत श्रीधर खत्रीलाई एमसीसी, नेपाल अमेरिका सम्बन्धबारे जिज्ञासा राखेका थिए ।
त्यसक्रममा प्रस्तावित राजदूत खत्रीले अमेरिकी सहयोग परियोजना मिलिनियम च्यालेन्ज कर्पोरेसन (एमसीसी) बारे नेपाल तथा अमेरिका दुवैतर्फबाट भ्रम फैलाउने काम भएका कारण गिजोलिन पुगेको बताउनुभएको थियो ।
संसदीय सुनुवाइ समितिमा बोल्दै खत्रीले एमसीसी नलिने भए नेपालले प्रष्टसँग अमेरिकालाई भन्न सक्नुपर्ने खत्रीको भनाइ थियो ।
