काठमाडौं । विभिन्न ६ वटा विद्यार्थी संगठनले त्रिभुवन विश्वविद्यालयलाई राजनीतिक भर्तीकेन्द्र बनाइएको भन्दै उपकूलपति कार्यालयमा तालाबन्दी गरेका छन् । करारमा रहेका उपप्राध्यापकलाई स्थायी गर्ने निर्णविरुद्ध भीसी, रजिस्टार र रेक्टरको कार्यालयमा ताला लगाइएको अखिल (छैठौं) का केन्द्रीय सदस्य पुरन पोखरेलले जानकारी दिनुभयो ।
प्रधानमन्त्री निवास बालुवाटारमा यही मङ्सिर १४ गते भएको त्रिविसभाको बैठकले १० वर्षदेखि करारमा रहेका अध्यापकलाई स्थायी गर्ने निर्णय गरेको थियो । सो निर्णयविरुद्ध विद्यार्थी संगठनहरु आन्दोलित भएका हुन् ।
करारमा रहेका उपप्राध्यापकलाई स्थायी गर्ने निर्णय तत्काल खारेज गर्नुपर्ने, त्रिवि सेवाद्वारा विज्ञापन गरिएका खुल्ला प्रतिष्पर्धाबाट हुने छनोट प्रक्रियाको परीक्षा मिति तत्काल तोकिनुपर्ने, लामो समयदेखि रोकिएको स्ववियु निर्वाचन फागुन १४ गते गर्नुपर्ने लगायतका माग राखी विभिन्न ६ वटा विद्यार्थी संगठनहरुले आन्दोलन गरेका हुन्।
बिहीबार भीसी, रजिस्टार र रेक्टर कार्यालयमा ताला लगाएर आन्दोलन थालेका विद्यार्थीले आफ्ना माग पुरा नभए थप कडा आन्दोलन गर्ने चेतावनी दिएका छन् । त्यसका लागि संयुक्त बैठक बसिरहेको र थप कार्यक्रम ल्याउने पोखरेलले बताउनुभयो ।
आन्दोलनरत ६ विद्यार्थी संगठनले विज्ञप्ति जारी गरेर नयाँ पुस्ताका प्रविधिमैत्री दक्ष जनशक्ति उत्पादन भइसकेको अवस्थामा त्यसलाई दुरुत्साहन हुनेगरी त्रिवि सेवा आयोगको नियमविपरीत राज्यलाई झण्डै रु एक अर्ब पाँच करोड बढी भारपर्ने गरी हुने आन्तरिक प्रतियोगिताको निर्णय खारेज गर्न माग गरेका छन् ।
‘विनाप्रतिस्पर्धा नै त्रिविको प्राध्यापक र कर्मचारी बन्न पाउनुपर्ने माग आफैँमा अप्राकृतिक, अनैतिक, अशोभनीय र हास्यास्पद छ’, विज्ञप्तिमा भनिएको छ, ‘हामी सो निर्णय खारेज गरी आम शैक्षिक युवाले प्रतिस्पर्धा गर्ने पाउने गरी विज्ञापन खुलाउन माग गर्दछौँ ।’
विज्ञप्तिमा अखिल (छैटौँ) का अध्यक्ष देवेन्द्र कुँवर, नेकपा (माओवादी केन्द्र) निकट अखिल (क्रान्तिकारी) का अध्यक्ष पञ्चा सिंह, नेकपा (एकीकृत समाजवादी) निकट अनेरास्ववियुका महासचिव आरती लामा, समाजवादी विद्यार्थी युनियनका अध्यक्ष रुपनारायण श्रेष्ठको हस्ताक्षर छ ।
