काठमाडौं । दार्चुलाको व्याँस गाउँपालिका–१ छाङरु र तिंकरमा जनगणना गर्न गएको टोली चार दिनको जोखिमपूर्ण यात्रापछि छाङरु पुगेको छ । भारतले बाटो नदिएपछि जनगणना टोली आफ्नै भूमिबाट जोखिमपूर्ण पैदल यात्रा गरी छाङरु पुगेको हो ।
टोली छाङरु पुगेर जनगणनाको काम सुरु गरेको जनगणना कार्यालय (दार्चुला) का प्रमुख पदमराज पाण्डेले जानकारी दिनुभयो । उहाँको अनुसार दुई दिनमा जनगणनाको काम सकिन्छ ।
गत कात्तिक २५ गते देशभर जनगणना थालिएको हो। तर दार्चुलाको व्याँस गाउँपालिका–१ का तिंकर र छाङरुमा भारतीय प्रशासनले जनगणना टोलीलाई त्यहाँ जान उसको भूमिमा पर्ने सहज सडक प्रयोगको अनुमति नदिँदा ढिलाइ भएको हो ।
जिल्ला प्रशासन कार्यालय दार्चुलाले कात्तिक २५ र ३० गते जनगणनाका लागि गणक भारतीय बाटो भएर जाने भएकाले सहजीकरण गरिदिन भारतको धार्चुला प्रशासनलाई पत्राचार गरेको थियो। तर भारतीय प्रशासनले बाटो बिग्रिएको बहाना बनाउँदै अनुमति दिएन।
त्यसपछि शुक्रबार सदरमुकाम खलंगाबाट जनगणना टोली आफ्नै भूमिको नेपाली बाटोबाट छाङरु र तिंकरका लागि प्रस्थान गरेको थियो ।करिब ४ दिनको जोखिमपूर्ण पैदल यात्रापछि सोमबार मात्रै टोलीले छाङरु पुगेको हो । तीन सदस्यीय टोलीमा एकजना भने हिँड्न नसकेर बिचबाटोबाटै फर्किएका थिए ।
यता, छाङरु र तिंकरबासी भने जाडो छल्न खलंगा झर्न थालेका छन् । छाङरु र तिंकरबासी हिँउदका ६ महिना चिसो छल्न खलंगा झर्ने गर्छन् । जनगणना टोली छाङरु र तिंकरमा खटिएको छ, तर तिंकरबासी भने खलंगा झरेकाले जनगणना कसरी गर्ने भन्ने द्विविधा थपिएको छ ।
तिंकर र छाङरुमा १ सय १३ परिवारको बसोबास छ। छाङरुबाट तिंकर करिब ११ किलोमिटरको दूरीमा छ। तिंकरमा ४० परिवारको बसोबास छ।
