बसन्त खड्का, अर्घाखाँची ।
अखिल नेपाल युवक संघले पेट्रोलियम पदार्थको मूल्यवृद्धि विरूद्ध प्रदर्शन गरेको छ । युवक संघले शुक्रबार अर्घाखाँचीको सदरमुकाम सन्धिखर्कमा विरोध प्रदर्शन गरेको हो ।
प्रदर्शनका क्रममा युवक संघले तत्काल पेट्रोलियम पदार्थमा गरिएको मूल्य वृद्धि फिर्ता लिन माग गरेको छ। ‘आयल निगमको अत्याचार भित्रभित्रै भ्रष्टाचार, जनतालाई मार्न पाइँदैन’ लगायत नाराहरु लगाउँदै बजार परिक्रमा गरी शान्ति बगैँचामा कोणसभा सम्पन्न भएको थियो ।
सभालाई राष्ट्रिय जनमोर्चाका महासचिव मनोज भट्टले सम्बोधन गर्दै सरकारले लगातार पेट्रोलियम पदार्थको मूल्य बढाउँदा सर्वसाधारण जनता मारमा परेको बताउनुभयो । उहाँले तत्काल मूल्यवृद्धि फिर्ता लिनुपर्ने बताउनु भयो । सम्बोधनका क्रममा नेता भट्टले एमसीसी नेपालको राष्ट्रियता, सार्वभौमिकता हितविरुद्ध भएको र नेपाल त्यसमा सामेल भए नेपालको असंलग्न परराष्ट्र नीति समाप्त हुने उल्लेख गर्नुभयो । लामो समयसम्म हिंसात्मक संघर्ष, राष्ट्रिय विखण्डनको षड्यन्त्र र अस्थिर राजनीतिबाट मर्माहत भएको स्थितिमा एमसीसीलाई अनुमोदन गर्नासाथ परिस्थिति झन् खराब हुने उहाँले दाबी गर्नुभयो।
विरोध प्रदर्शनमा जिल्ला अध्यक्ष कुलराज खनाल लगायत नेताहरुको उपस्थिती रहेको थियो । जिल्ला सचिव ठाकुर पंथि सुनारको सञ्चालनमा कार्यक्रम सम्पन्न भएको थियो ।
नेपाल आयल निगमले गएको बुधबार रातिदेखि लागू हुनेगरी डिजेल, मट्टितेल र पेट्रोलमा ३–३ रुपैयाँ तथा एलपी ग्यासमा ७५ रुपैयाँ प्रतिसिलिण्डर मूल्य वृद्धि गरेको थियो ।
