कैलाली । चक्कु प्रहार गरी एक युवकको हत्या भएपछि कैलालीको लम्की बजार तनावग्रस्त बनेको छ । आक्रोशित स्थाीनयले पूर्वपश्चिम राजमार्ग अवरुद्ध गरेका छन् ।
मंगलबार राति लम्कीचुहा नगरपालिका–१ का २२ वर्षीय भूपेन्द्र बडुवालको हत्या भएको थियो । टीकापुरस्थित होटल सिद्धार्थनजिक राति ९ बजे एक समूहले धारिलो हतियार प्रहार गरेर बडुवालको हत्या गरेको इलाका प्रहरी कार्यालय टीकापुरले जनाएको छ ।
युवकको हत्यापछि स्थानीयले लम्की बजारमा पूर्व–पश्चिम राजमार्ग अवरूद्ध गरेर बुधबार बिहानैदेखि प्रदर्शन गरिरहेका छन् ।
चक्कु प्रहार गरी युवकको हत्या गरेको आरोपमा ८ जना पक्राउ परेका छन् । जिल्ला प्रहरी कार्यालय कैलालीका प्रमुख तथा प्रहरी उपरीक्षक विश्व अधिकारीले बडुवालको हत्यामा संलग्न भएको आरोपमा ५ जना र अन्य तीन जनालाई पनि पक्राउ गरिएको बताउनुभयो ।
एसपी अधिकारीले चिसापानीस्थित संगम होटलका सञ्चालक हर्कबहादुर रावल, उनकी श्रीमती र छोरा महेशलाई पनि पक्राउ गरिएको जानकारी दिनुभयो । युवकको हत्या घटनामा होटल सञ्चालक रावलका अर्का छोरा नविनको संलग्नता देखिएको तर उनी फरार रहेको प्रहरीको भनाई छ ।
प्रहरीका अनुसार आइतबार नेपाली सेनाको सुदूरपश्चिम पृतना तालिम शिक्षालय गोरङ्गेका मेजर अशोकजँग शाहीसँग सोही होटलका सञ्चालक रावलको विवाद भएको थियो । आक्रोशित स्थानीयले ढुङ्गामुढा गरेर मेजरको निजी गाडीमा तोडफोड गरेका थिए भने उनको टाउकोमा पनि चोट लागेको थियो ।
प्रहरीले बडुलामाथि चक्कु प्रहार गरेको आरोपमा आर्यन देवकोटासहित पाँच जनालाई पक्राउ गरि अनुसन्धान सुरु गरेको जनाएको छ । युवकको शव टीकापुर अस्पतालमा राखिएको छ।
